Łukašenka ŭpieršyniu źbirajecca naviedać MDŁU — adzin z samych pratesnych univiersitetaŭ u 2020-m
Pra heta «Našaj Nivie» paviedamili niekalki krynic. Pa ich słovach, univiersitet ciapier staić na vušach i ekstranna ramantujecca.
30.10.2024 / 13:02
Fota: Contributor Getty Images
Pavodle našych surazmoŭcaŭ, vizit Łukašenki maje adbycca 1 listapada.
«Univiersitet rychtujuć, myjuć, ramantujuć, mianiajuć dźviery, źjaviłasia šmat žyvych kvietak na vulicy», — kaža adna z krynic.
Druhaja dadaje, što «navat tualety ekstranna pryvodziać da ładu». A hrukat ad ramontu zaminaje vučebnym zaniatkam.
Anonsaŭ vizitu Łukašenki ŭ Linhvistyčny ŭniviersitet nidzie niama. Na sajcie VNU na vyšejzhadanuju datu zapłanavana tolki Mižnarodnaja navukovaja moładzievaja kanfierencyja «Mir i talerantnaść praz vyvučeńnie moŭ i hramadzianskuju adukacyju».
Prahrama kanfierencyi nasyčanaja: studentam buduć pryvivać važnaść «hramadzianska-patryjatyčnaha vychavańnia, vyvučeńnia nacyjanalnaj historyi i movy, zdarovaha ładu žyćcia, farmavańnia talerantnaha śvietapohladu, humanizmu» i navat raspaviadać pra «hiendarnuju talerantnaść u adukacyjnym asiarodździ». Sumiaščać heta buduć jašče i z «prafiłaktykaj ekstremizmu siarod moładzi».
Frahmient prahramy Mižnarodnaj navukovaj moładzievaj kanfierencyi «Mir i talerantnaść praz vyvučeńnie moŭ i hramadzianskuju adukacyju», jakaja budzie pravodzicca ŭ MDŁU z 31 kastryčnika pa 1 listapada
Adznačym, što dla Łukašenki heta budzie pieršaje naviedvańnie Minskaha linhvistyčnaha ŭniviersiteta. Niadaŭna «Naša Niva» atrymała źviestki, što ad pačatku 2022 hoda da vosieni 2023-ha z MDŁU pa ŭłasnym žadańni adličylisia bolš za 1000 studentaŭ (dzionnaj i zavočnaj formy razam z metavikami).
Heta antyrekord za sučasnuju historyju VNU, adznačyli krynicy «Našaj Nivy» ź sistemy adukacyi krainy.
Pa ich słovach, siarod dobraachvotna adličanych bolš za ŭsio studentaŭ dzionnaj formy navučańnia (kala 900 čałaviek). Taksama zabrali dakumienty bolš za 100 čałaviek z zavočnaj formy navučańnia i dziasiatak tych, chto vučycca pa metavym nakiravańni.
Minski dziaržaŭny linhvistyčny ŭniviersitet. Fota: «Jandeks Mapy»
Ź niedaboram studentaŭ sutykajucca i inšyja VNU krainy, što publična pryznajuć i ŭ Minadukacyi. Tak, ministr adukacyi Andrej Ivaniec na Respublikanskim piedsaviecie 27 žniŭnia raskazaŭ, što pa vynikach ustupnaj kampanii 2024 hoda biełaruskija VNU ahułam niedabrali kala 870 čałaviek. Heta vyklikała abureńnie Alaksandra Łukašenki, jaki paskardziŭsia, što siońnia abituryjentaŭ «ledź nie zahaniajuć» vučycca, a ich usio roŭna nie chapaje.
Pra niedabor studentaŭ aficyjna paviedamlałasia i ŭ papiarednija hady. Paśla ŭstupnaj kampanii 2021 hoda Minadukacyi dało spravazdaču, što ŭniviersitetam nie chapała kala 5 tysiač studentaŭ usich formaŭ navučańnia, ź ich na biudžetnyja miescy niedabrali kala 500 čałaviek (adnak paśla dadatkovych naboraŭ, pavodle viedamstva, ahulnaja kolkaść niedaboru istotna źniziłasia).
U 2022 hodzie Minadukacyi vyrašyła nie ŭźnimać temu niedaboru płatnikaŭ, adznačyŭšy, što paśla asnoŭnaha naboru nie chapała kala 400 čałaviek na biudžet (paśla dadatkovaha naboru hetaja ličba taksama źniziłasia).
Nahadajem, što ŭ 2020 hodzie padčas pratestaŭ suprać hvałtu siłavikoŭ i sfalsifikavanych vynikaŭ prezidenckich vybaraŭ u mnohich biełaruskich VNU adbyvalisia masavyja mirnyja studenckija demanstracyi i strajki. U ich taksama prymali ŭdzieł vykładčyki i inšyja supracoŭniki ŭniviersitetaŭ.
Na ŭsio heta režym Łukašenki adkazaŭ štrafami, zapałochvańniami, źbićciom, zvalnieńniami, adličeńniami i aryštami ŭniviersiteckich pratestoŭcaŭ. Naprykład, čatyry hady tamu 4 vieraśnia atrad supracoŭnikaŭ AMAP u cyvilnym uvarvaŭsia na terytoryju MDŁU i pačaŭ žorstka zatrymlivać studentaŭ, jakija pamiž zaniatkami sabralisia śpiavać u chole ŭniviersiteta pieśni i skandavali «Žyvie Biełaruś».
Na pačatak 2021 hoda było viadoma pra 131 vypadak represiŭnych adličeńniaŭ i 23 kryminalnyja spravy ŭ dačynieńni da studentaŭ roznych VNU. Dziasiatki vykładčykaŭ byli zvolnienyja.
Łukašenka na sustrečy sa studentami pakazaŭ svoj mabilnik