U roznych krainach Jeŭropy prajšła Noč rasstralanych paetaŭ FOTY

U noč na 30 kastryčnika 1937 hoda ŭ Minsku byli rasstralanyja prynamsi 132 dziejačy biełaruskaj kultury, navuki, tahačasnych čynoŭnikaŭ. Siarod ich byli 22 litaratary. U 2024 hodzie akcyi pamiaci prachodziać bolš jak u 40 haradach nie mienš čym 15-ci krain śvietu.

30.10.2024 / 00:18

U Vilni impreza pamiaci «Noč (nie)rasstralanych paetaŭ» prajšła na vulicy Achviaraŭ (Aukų g.) niepadalok ad taho budynka, dzie ŭ svoj čas mieściŭsia litoŭski filijał KDB.

U varšaŭskim Muziei Volnaj Biełarusi pry padtrymcy teatra «Dzieja Druhaja» i varšaŭskaj supołki Tavarystva biełaruskaj movy adbyŭsia viečar pamiaci, pryśviečany hetaj kryvavaj dacie ŭ historyi Biełarusi — masavamu rasstrełu pradstaŭnikoŭ biełaruskaj intelektualnaj elity.

Padčas imprezy prahučali tvory biełaruskaha muzyčnaha mastactva ŭ vykanańni kampazitara Illi Siemaškieviča. Prafiesijnyja akciory i hramadskija dziejačy pračytali vieršy achviaraŭ palityčnych represij. Namieśnik kiraŭnicy Abjadnanaha Pierachodnaha Kabinieta Biełarusi, kiraŭnik Narodnaha antykryzisnaha ŭpraŭleńnia Pavieł Łatuška pračytaŭ uryvak z paemy Anatola Volnaha «Kastuś Kalinoŭski».

U Biełastoku ŭ pamiać Nočy rasstralanych paetaŭ 1937 hoda vystupiŭ Volny Chor z Varšavy. Jon pradstaviŭ admysłovuju prahramu na vieršy represavanych stalinskim režymam tvorcaŭ. Kancert adbyŭsia ŭ simvaličnym miescy — Muziei pamiaci Sibiry.

Fota: Radyjo «Racyja»

U «Domie Volnaj Biełarusi» ŭ Lvovie byŭ pakazany dakumientalny film «Les», jaki apaviadaje niekalki realnych historyj stalinskich represij na Homielščynie ŭ 1930-ch hadach. U filmie vykarystany archiŭnyja videa– i aŭdyjomateryjały, na jakich vidavočcy raskazvajuć pra padziei 1930-ch hadoŭ.

Akramia biełarusaŭ u mierapryjemstvie ŭziali ŭdzieł sustaršynia Lihi ŭkrainskich žančyn Mirasłava Cimčyšyn, studenty histfaka Lvoŭskaha nacyjanalnaha ŭniviersiteta imia Ivana Franka, ahrarnaha ŭniviersiteta, a taksama ŭkrainskaja moładź, jakaja dapamahaje biełaruskim dobraachvotnikam.

Fota: facebook.com/lesha.franc

Jak mahła b vyhladać sustreča z paetam Todaram Klaštornym, rasstralanym u 1937 hodzie

«Noč rasstralanych paetaŭ». Raskład i adrasy mierapryjemstvaŭ pa ŭsim śviecie

Vieršy rasstralanych u 1937-m paetaŭ prahučać u farmacie śpiektakla-kancerta

Kupałaŭcy źnialisia ŭ filmie pra 1930-ja. Premjera zaŭtra

Nashaniva.com