Maryna Mientusava adkazała tym, chto krytykuje mirnyja pratesty i akcyi žančyn z kvietkami
Aśvietnica na temu hiendarnaj roŭnaści i viadučaja jutub-šou Maryna Mientusava była adnoj z arhanizatarak žanočych pratestaŭ. U novym vypusku jutub-kanała «ČastnOK-Live» jana adkazała na pretenzii tych, chto narakaje, što mirnyja pratesty nie zdoleli źmianić uładu.
30.10.2024 / 20:50
Maryna Mientusava. Fota: jaje fejsbuk
«Jak šmat pieraškadžaje efiektyŭnym palitykam ździajśniać svaje efiektyŭnyja revalucyi ŭ Biełarusi. Bosyja žančyny pieraškodzili, u sukienkach, kvietki pieraškodzili… Chto vam pieraškadžaŭ vyvodzić za saboju ludziej? Čamu ludzi nie pajšli za vami? Mnie zdajecca, hetyja pytańni važna sabie zadavać. Refleksija vielmi patrebnaja. Voś čamu za vami nie pajšli? Značyć vy rabili niešta nie tak», — zaŭvažyła Mientusava.
Jana tłumačyć, što ludzi pajšli za mirnymi łozunhami, tamu što vializnaja kolkaść žycharoŭ Biełarusi vystupaje suprać hvałtu:
«Čamu vyjšła tak šmat žančyn? Tamu što vializnaja kolkaść žančyn u krainie vystupaje suprać hvałtu. Vializnaja kolkaść žančyn u krainie viedaje, što takoje hvałt. Jak šmat jaho za začynienymi dźviaryma, jak šmat jaho ŭ siemjach. Jak šmat hvałtu ŭ krainie, jakaja nie ratyfikavała Stambulskuju kanviencyju, [u jakoj] niama zakona suprać chatniaha hvałtu».
Adnosna zaŭvah asobnych ludziej ab tym, što pratest pavinien byŭ być sa zbrojaj, Maryna Mientusava havoryć: «Moža być, my žyviom usio ž taki ŭ krainie, u jakoj užo bolej jeŭrapiejskich kaštoŭnaściej, čym vam zdajecca?»
Jana zaŭvažaje, što joj da hetaj pary prylataje. «Za toje, što ja vinavataja, asabista ja kvietkami pieraškodziła ździejśnicca efiektyŭnaj mužčynskaj revalucyi. Mužčynskaj u dužkach, tamu što heta taksičnaja muskulinnaść: treba ŭsich pabaroć, usich pabić, tolki zbroja, tolki terminovaja słužba ŭ vojsku, tolki hvałt dapamoža spynić hvałt».
Z takoj pazicyjaj jana nie zhodnaja, bo ŭpeŭniena, što hvałtam u adkaz hvałt nie spynić:
«Hvałt paŭtaraje koła hvałtu. Heta cykł hvałtu. Niemahčyma spynić hvałt hvałtam. Heta tak nie pracuje».
Demakratyčnyja pieramieny — heta niaprosta, razvažaje Maryna.
«Chto skazaŭ, što ŭ nas ź pieršaha razu atrymajecca? Ja vieru ŭ toje, što ŭ Biełarusi budzie vializnaja kolkaść šancaŭ stać častkaj Jeŭropy, Jeŭrasajuza, kali my hety šlach abiarom. Nie budziem spadziavacca na Połk Kalinoŭskaha, jaki pryjdzie i zaraz rasstralaje Łukašenku, ustanović vajennuju ŭładu».
Mientusava dzielicca: u tyja dni jana hanaryłasia, što ludzi vybrali nie hvałtoŭny mietad pratestu.
«Kali ludzi ržuć z hetych pratestoŭcaŭ, jakija ŭstavali bosyja na łavački, mnie škada hetych ludziej, jakija z hetaha śmiajucca, tamu što heta kraina majoj mary, u jakoj ludzi voś tak adstojvajuć svajo prava. Heta nadzvyčajna. Ja chaču žyć voś u takoj krainie».
Jutub-šou «Obyčnoje utro» pakinuła viadučaja. Chto staŭ novaj?
Maryna Mientusava raskazała pra razryŭ z mužčynam. Pryčyna vas ździvić