Źjaŭleńnie paŭnočnakarejskich vojskaŭ va Ukrainie — krok da Treciaj suśvietnaj?
Što jany tam buduć rabić, što atrymaje za heta Paŭnočnaja Kareja i što budzie dalej?
01.11.2024 / 19:06
Kim Čen Yn abychodzić šerahi vajskoŭcaŭ. Fota: KCNA
Kala 8000 sałdat z Paŭnočnaj Karei ŭžo prybyli da rasijska-ŭkrainskaj miažy i rychtujucca ŭstupić u boj «u najbližejšyja dni». Pra heta ŭ čaćvier 31 kastryčnika zajaviŭ kiraŭnik Dziaržaŭnaha departamienta ZŠA Entani Blinkien.
Jahonyja słovy pryvodzić ahienctva AP.
Usiaho, pa acenkach Vašynhtona, na terytoryi Rasii znachodzicca kala 10 000 vajskoŭcaŭ z KNDR. Paŭdniovaja Kareja aceńvaje ich kolkaść u 11 000, a Ukraina — u 12 000.
Pra hatoŭnaść KNDR akazvać dapamohu armii Rasii aficyjna zajaviła kiraŭnica MZS hetaj krainy Coj Son Chi, jakaja znachodzicca z aficyjnym vizitam u Maskvie:
«Z samaha pačatku SVA pavažany tavaryš, staršynia dziaržaŭnych spraŭ Kim Čen Yn daŭ ukazańnie, kab my, ni na kaho nie ahladajučysia, niaźmienna i mahutna padtrymlivali i akazvali dapamohu rasijskamu vojsku, rasijskamu narodu».
Jak piša rasijski palitołah Siarhiej Markaŭ, «imavierna, užo praź niekalki dzion vajskoŭcy KNDR aficyjna ŭstupiać u boj suprać ukrainskaj armii».
Markaŭ ličyć, što kolkaść sałdat KNDR nie zmoža istotna paŭpłyvać na chod bajavych dziejańniaŭ. A voś analityk ukrainskaha analityčnaha centra Come Back Alive Initiatives Center Hleb Vałoski ŭ intervju AP adznačyŭ, što pryciahnieńnie kala dziesiaci tysiač paŭnočnakarejskich vajskoŭcaŭ da ŭdziełu ŭ vajennych dziejańniach «moža surjozna destabilizavać ukrainskuju abaronu» i «istotna paskoryć prasoŭvańnie rasijskich vojskaŭ».
U lubym vypadku razhortvańnie padraździaleńniaŭ, ukamplektavanych paŭnočnakarejskimi vajskoŭcami, dazvolić RF vyzvalić dla frontu častku rasijskich vajskoŭcaŭ.
Čym buduć zajmacca paŭnočnakarejskija sałdaty?
Siarhiej Markaŭ nie viedaje, čym buduć zajmacca paŭnočnakarejcy. «Moža, artyleryjaj stralać? Moža, u tyle achoŭvać abjekty, kab rasijskich sałdat možna było pierakinuć na front? Moža, u šturmy chadzić?» — razvažaje analityk.
Na jahony pohlad, armija KNDR budzie pakul raźmiaščacca tolki ŭ Kurskaj vobłaści, ale paźniej moža być pierakinutaja i na Danbas, jaki Paŭnočnaja Kareja pryznała častkaj Rasii.
Kiraŭnik Dziaržaŭnaha departamienta ZŠA vykazaŭ mierkavańnie, što rasijskija vajskoŭcy navučajuć paŭnočnakarejskich kaleh karystacca artyleryjskaj zbrojaj i bieśpiłotnikami, a taksama «asnoŭnym piachotnym apieracyjam, uklučajučy začystku akopaŭ, što śviedčyć pra toje, što jany poŭnaściu majuć namier vykarystoŭvać hetyja siły ŭ apieracyjach na pieradavoj».
Staršy daradca prahramy mižnarodnaj biaśpieki adnaho z najbujniejšych amierykanskich analityčnych centraŭ CSIS pałkoŭnik u adstaŭcy Mark Kansijan u intervju Forbes Ukraine źviartaje ŭvahu, što častka adpraŭlenych u Rasiju paŭnočnakarejskich sałdat uvachodzić u XI «šturmavy» korpus — śpiecpadraździaleńnie, jakoje fakusujecca na dziejańniach u tyle, sabatažy i zabojstvach. Historyja korpusa viadziecca ad padraździaleńnia «atrad 124», jakoje ŭ 1968 hodzie ździejśniła niaŭdały rejd z metaj zabojstva tahačasnaha prezidenta Paŭdniovaj Karei Pak Čon Chi.
Takija vajskoŭcy, biezumoŭna, lepš padrychtavanyja da viadzieńnia bajavych dziejańniaŭ, čym rasijskija pryzyŭniki, jakija nie majuć praktyčna nijakaj praktyki.
Na dumku analityka, paŭnočnakarejskija vojski mohuć zajmacca hłybokaj raźviedkaj abo dziejańniami na linii frontu, kali jany sapraŭdy źjaŭlajucca častkaj sił śpiecpryznačeńnia. Sałdaty z KNDR mohuć taksama zajmacca łahistykaj, techničnym absłuhoŭvańniem, apieracyjami z dronami.
U toj ža čas pryciahnieńnie da niepasrednaha ŭdziełu ŭ bajach analityk ličyć ryzykoŭnaj stratehijaj z-za mahčymaści deziercirstva ci traplańnia ŭ pałon.
Navošta heta Paŭnočnaj Karei?
Siarhiej Markaŭ adznačaje, što hałoŭnaja meta kiraŭnictva Paŭnočnaj Karei — navučyć svaich sałdat supiersučasnaj vajnie.
Paŭnočnakarejskija vajskoŭcy atrymajuć bajavy vopyt, jakoha jany nie mieli ŭ vialikich maštabach užo niekalki dziesiacihodździaŭ — z taho času, jak u 1953 hodzie Karejskaja vajna skončyłasia pieramirjem.
Jak raskazvaje Kansijan, Paŭnočnaja Kareja raniej adpraŭlała dla ŭdziełu ŭ zamiežnych vojnach tolki nievialikija hrupy ź niekalkich dziasiatkaŭ kansultantaŭ ci vuzkaprofilnych śpiecyjalistaŭ. Dapamoha Rasii — pieršaja adpraŭka vialikaj kolkaści suchaputnych vojskaŭ.
Akramia hetaha, Paŭnočnaja Kareja, adpraŭlajučy svaje vojski ŭ Rasiju, vyrašaje i inšuju prablemu. Jak zaŭvažaje Kansijan, kraina maje patrebu ŭ zamiežnaj valucie.
Rasija, chutčej za ŭsio, apłačvaje ŭsie vydatki, źviazanyja z razhortvańniem kantynhientu i vypłačvaje hrašovaje ŭtrymańnie samim sałdatam. Pa danych paŭdniovakarejskaj raźviedki, hetaja suma składaje $2000 na sałdata ŭ miesiac. Radavy paŭnočnakarejski sałdat ubačyć tolki nievialikuju častku hetych hrošaj, bolšuju častku atrymaje dziaržava.
Uschodaznaŭca Andrej Łańkoŭ u intervju Deutsche Welle padličyŭ, što za 10 tysiač svaich sałdat biudžet Paŭnočnaj Karei moža atrymać kala 100 miljonaŭ dołaraŭ za hod — hihanckaja suma dla krajnie biednaj dyktatury.
Łańkoŭ taksama źviartaje ŭvahu na toje, što Paŭnočnaja Kareja zacikaŭlenaja ŭ dostupie da rasijskich vajskovych technałohij, asabliva da technałohij dastaŭki jadziernaj zbroi, spadarožnikavaj raźviedki i budaŭnictva atamnych padłodak.
U zvyčajnaj situacyi Rasija nie pieradaje takich technałohij inšym krainam, ale z pryčyny ciapierašniaha supracoŭnictva ŭ vajskovaj śfiery Paŭnočnaja Kareja moža ŭzmacnić cisk. Heta moža ŭskładnić admovu Maskvy i pryvieści da pieradačy niekatorych technałohij.
Kolki sałdat moža pastavić Paŭnočnaja Kareja?
Kansijan adznačaje, što Paŭnočnaja Kareja moža ŭ budučyni prysłać dadatkovyja padraździaleńni. Tolki śpiecnazaŭcaŭ, pa acenkach Paŭdniovaj Karei, jana maje kala 200 tysiač.
Andrej Łańkoŭ dapuskaje, što Paŭnočnaja Kareja moža pasłać u Rasiju da 60 tysiač sałdat.
Ličycca, što kolkaść armii KNDR składaje kala 1,2 młn čałaviek. Terminovaja słužba abaviazkovaja i dla mužčyn, i dla žančyn. Dla mužčyn jana składaje da 10 hadoŭ. Adnak prykładna pałova asabovaha składu — heta budaŭničyja bataljony i «vajenizavanyja atrady sielhasrabočych». Astatniaja pałova — bajavyja častki. Adpraŭka 10% ad hetaj kolkaści, na dumku śpiecyjalista, nie źnizić bajazdolnaści.
Analityki źviartajuć uvahu, što kolkaść paŭnočnakarejskich vojskaŭ u budučyni budzie zaležać ad reakcyi Zachadu. Pakul što zachodnija aficyjnyja asoby ničoha, akramia zajavaŭ pra toje, što pryciahnieńnie vojskaŭ treciaj krainy ŭ vajnu va Ukrainie adznačaje jaje eskałacyju, nijakich krokaŭ nie robiać.
Jak piša Bloomberg, vybar varyjantu dziejańniaŭ u adkaz moža padzialić ZŠA i ich sajuźnikaŭ. Im daviadziecca vyrašyć, ci varta adkazvać eskałacyjaj na eskałacyju.
U toj ža čas, pa słovach vysokapastaŭlenaha paŭdniovakarejskaha čynoŭnika, Sieuł razhladaje mahčymaść pramoj pastaŭki zbroi va Ukrainu, admianiŭšy palityku zabarony na akazańnie dapamohi zbrojaj krainie, jakaja vajuje.
Kali častka vielizarnych zapasaŭ artyleryjskich snaradaŭ Sieuła pačnie nakiroŭvacca niepasredna ŭ Kijeŭ, razam z pastaŭkami Pchieńjana ŭ Rasiju, heta pryviadzie da taho, što ŭ kanflikcie buduć zadziejničanyja dźvie najbujniejšyja artyleryjskija siły ŭ śviecie.
Blinkien: Paŭnočnakarejskija vojski nieŭzabavie ŭstupiać u boj z USU ŭ Kurskaj vobłaści
NATA paćvierdziła prysutnaść vajskoŭcaŭ KNDR na Kurščynie
Ukraina apublikavała VIDEA ź dziasiatkami sałdat KNDR, jakija atrymlivajuć rasijskuju formu