Pres-sakratarka partyi Trampa maje biełaruskija karani FOTY
29-hadovaja Elizabet Pipko ŭ minułym zajmałasia fihurnym katańniem i była madellu. Adnak vybrała palityčnuju karjeru.
12.11.2024 / 18:26
Elizabet Pipko. Fota: elizabethpipko / Instagram
29-hadovaja Elizabet Pipko pracuje pres-sakratarom Nacyjanalnaha kamiteta Respublikanskaj partyi. Paśla pieramohi Donalda Trampa na vybarach jaje moža čakać bliskučaja karjera.
Dziaŭčyna naradziłasia 26 červienia 1995 hoda ŭ Ńju-Jorku. Jaje maci — viadomaja pijanistka i dačka mastaka Marka Klijonskaha, jaki naradziŭsia ŭ Minsku ŭ 1927 hodzie i nabyŭ viadomaść u SSSR jašče ŭ maładym uzroście. Jon staŭ samym maładym mastakom, čyja praca była pradstaŭlena ŭ Traćciakoŭskaj halerei ŭ Maskvie.
U 1974 hodzie Klijonski pierajechaŭ u ZŠA, dzie prasłaviŭsia jak partretyst. U svajoj knizie «Znajści svajo miesca» (Finding My Place, 2020) Elizabet zhadvaje, što dziadula pryjechaŭ u Štaty z 90 dalarami ŭ kišeni. Jana taksama dzielicca ŭspaminami ab tym, što dziadula nazyvaŭ jaje «kookalka», a baćku pradstaŭlaje «adnym z samych strohich ruskich baćkoŭ».
U dziacinstvie Pipko prafiesijna zajmałasia fihurnym katańniem, ale ŭ piatnaccać hadoŭ była vymušana spynić spartyŭnuju karjeru z-za traŭmy ščykałatki.
Jana skončyła Harvardskuju škołu (Harvard Extension School), atrymała stupień mahistra navuk u Piensilvanskim univiersitecie. Paralelna Elizabet rabiła karjeru madeli. Jaje zdymki źjaŭlalisia na staronkach takich časopisaŭ, jak Maxim, Sports Illustrated, Harper's Bazaar, Esquire.
Fota: elizabethpipko / Instagram
U palityku Pipko pryjšła ŭ 2016 hodzie, kali dałučyłasia da prezidenckaj kampanii Donalda Trampa ŭ jakaści kaardynatara pa pracy z vałanciorami.
U čas toj pieradvybarčaj kampanii Elizabet paznajomiłasia sa svaim budučym mužam Darenam Senciniełam, ź jakim uziała šlub u 2018 hodzie.
U 2019 hodzie jana stała adnoj z zasnavalnic i klučavych asobaŭ ruchu Jexodus ( spałučeńnie słoŭ Jewish i exodus — «jaŭrei» i «zychod»), jaki byŭ paźniej pierajmienavany ŭ Exodus, aryjentavanaha na zaachvočvańnie jaŭrejskaj moładzi da pierachodu ad tradycyjnaj padtrymki Demakratyčnaj partyi da respublikancaŭ. Ruch śćviardžaŭ, što prahresiŭnaja palityka demakrataŭ nie zaŭsiody adpaviadaje intaresam amierykanskaj jaŭrejskaj supolnaści, asabliva ŭ takich pytańniach, jak padtrymka Izraila.
U intervju časopisu OK! jana raskazvała: «Kali ja trapiła ŭ palityčny śviet, ja zrazumieła, što adziny sposab dla mianie nie tolki vyžyć, ale i dasiahnuć pośpiechu — heta stvaryć niešta značnaje. Tamu ja nakiravała svaje namahańni na baraćbu za jaŭrejski narod i suprać antysiemityzmu».
U studzieni 2023 hoda Elizabet zapuściła prajekt Lest People Forget — hłabalnuju płatformu dla ŭšanavańnia pamiaci pra Chałakost, zasnavanuju na krypta-technałohijach.
Donald Tramp i Elizabet Pipko. Fota: elizabethpipko / Ch
U lutym 2022 hoda, adkazvajučy na pytańnie ab rasijskaj ahresii suprać Ukrainy, Pipko skazała Fox News: «Ja čuła, jak ludzi pytajucca: «Čamu my pavinny kłapacicca pra toje, što adbyvajecca ŭ Rasii i Ukrainie siońnia?» My, amierykancy, viedajem, za što staim, i my viedajem, što ataka na demakratyju dzie-niebudź — heta ataka na demakratyju ŭsiudy».
Elizabet Pipko. Fota: elizabethpipko / Instagram
Pres-sakratarom Nacyjanalnaha kamiteta Respublikanskaj partyi Elizabet stała ŭ mai 2024 hoda.
Raniej u intervju časopisu Magazine jana kazała, što choča być rolevaj madellu dla maładych žančyn: «Treba pakazać maładym dziaŭčatam, što jany mohuć rabić usio, što zachočuć. Ad madelinhu da palityki i ŭsiaho, što pamiž imi».
Šviedskaja zorka chip-chopa ź minskaha padjezda. Chto taki Yung Lean
Daśledčyca adšukała biełaruskija karani Epłbaŭm
Manietačka raskazała pra svaje biełaruskija karani