Jak chłopiec z Babrujska staŭ zorkaj va Ukrainie
Biełarus Uład Čyžykaŭ dva razy sprabavaŭ prabicca na Jeŭrabačańnie ad Biełarusi, u svoj čas jaho adroksia pradziusar Maks Alejnikaŭ. Ciapier chłopiec śpiavaje va Ukrainie, a jaho klipy nabirajuć miljony prahladaŭ.
24.11.2024 / 16:24
Uład Čyžykaŭ. Fota: vlacheev / Instagram
Pra vykanaŭcu Ułada Čyžykava ŭ novym vypusku jutub-kanała «Ministerstva siepultury» raskazaŭ žurnalist Alaksandr Čarnucha.
Chłopiec naradziŭsia ŭ Babrujsku, ź dziacinstva zajmaŭsia muzykaj, a svaju pieršuju pieśniu napisaŭ u 6 hadoŭ. Jak zhadvaŭ Uład, pieśnia była pra bulbu i toje, jak jana ćvicie.
Uład Čyžykaŭ u dziacinstvie. Fota: vlacheev / Instagram
Padčas vučoby ŭ Minsku chłopiec vystupaŭ u barach i restaranach.
U 2013-m 19-hadovy Uład pieramoh u muzyčnym konkursie «Akademija talentaŭ» na ANT. Tam jon vykanaŭ pieśniu kampazitara i pradziusara Maksa Alejnikava «Lubov, kotoroj bolšie niet». Paśla pieramohi chłopiec pačaŭ pracavać razam z Alejnikavym. Ale ŭ chutkim časie jon staŭ pradziusaru niepatrebny.
Razam sa svaim siabram hitarystam Vitalom Viačerskim u 2014 hodzie Čyžykaŭ stvaryŭ hurt «Radyjochvala», jaki pryniaŭ udzieł u teleprajekcie «Lehiendy.live» na ANT. U 2016 i 2018 hadach hurt udzielničaŭ u Nacyjanalnym adboračnym tury na Jeŭrabačańnie. Biez pośpiechu.
Tady Čyžykaŭ pasprabavaŭ siabie va ŭkrainskich šou «Ch-faktar» (u 2016-m) i «Hołas krajini» (2019).
Paśla vystupleńnia na apošnim zała skandavała Čyžykavu «małajčyna», a nastaŭniki ledź nie pasvarylisia: kožny sprabavaŭ uhavaryć artysta pajści mienavita ŭ jaho kamandu.
Adnak i hetaja pieramoha nie dała čakanych vynikaŭ.
Svoj udzieł u roznych telekonkursach Uład tłumačyŭ nieabchodnaściu pakazać siabie i zaŭvažaŭ, što nasamreč usie takoha rodu konkursy jon nienavidzić, bo «tam ničoha nie znojdzieš». «Chaciełasia dapamohi, ale jana nie prychodzić pa-za telekamierami», — pryznavaŭsia śpiavak u adnym ź intervju.
Praź niekatory čas hurt «Radyjochvala» pierastaŭ isnavać, a Uład Čyžykaŭ praciahnuŭ śpiavać. Jon pačaŭ zapisvać kaviery na papularnyja ŭkrainskija chity i raźmiaščać u sacyjalnych sietkach.
Jak zhadvaŭ Uład, dajšło da taho, što jon navat na biełaruskim telebačańni staŭ vykonvać ukrainskija pieśni. Jany hučali i na biełaruskim radyjo.
Cikavaść mienavita da ŭkrainskaj muzyki Uład tłumačyŭ tak: «Ukrainskaja muzyka dla mianie zaŭsiody była muzykaj ekśpierymientaŭ i dušy. A ŭ ruskaj muzycy ja čuŭ tolki hrošy. (…) Jak nie lubiŭ «savieckich» piesień, tak i ruskaj papsy nie lubiŭ. Ja chacieŭ raźvivacca ŭ Biełarusi, być krutym biełaruskim artystam biez Rasii. Čamu ja pavinien tudy iści?»
U Minsku Uład padrychtavaŭ ceły albom piesień na ŭkrainskaj movie, jaki vypuściŭ u 2021 hodzie, kali pierajechaŭ u Kijeŭ.
Ciapier Čyžykaŭ našmat papularniejšy va Ukrainie za tamtejšaha vykanaŭcu Alekseeva, jaki ŭ 2018 hodzie pradstaŭlaŭ Biełaruś na Jeŭrabačańni.
Pieršym chitom, jaki prynios viadomaść Čyžykavu, stała pieśnia «Harno tak» (ciapier maje 24 miljony prahladaŭ na jutubie i bolš za 5 miljonaŭ na Spotify), słovy i muzyku da jakoj jon napisaŭ sam. Spačatku pieśnia stała chitom u tyktoku.
U listapadzie 2023 hoda śpiavak vypuściŭ svoj druhi albom Noir. A zusim niadaŭna NAVIBAND zapisali svoj klip «Mama» razam z Uładam na ŭkrainskaj movie.
Ciapier Čyžykaŭ žyvie i pracuje ŭ Kijevie. Jaho pieśni hučać na radyjo i telebačańni. A sam jon kaža, što znachodzicca ŭ čas vajny va Ukrainie dla jaho našmat biaśpiečniej, čym u Biełarusi.
Jak adznačaje Čarnucha, prykład Ułada Čyžykava jaskrava śviedčyć ab tym, što dla taho, kab stać zorkaj, zusim nie abaviazkova jechać u Rasiju. «Pośpiech Ułada — heta sprava sumleńnia i ambicyj, bo mienavita tak i pracuje sapraŭdnaja tvorčaść — być ščyrym i być volnym rabić vybar».
Čarhovy biełarus vyklikaŭ furor na ŭkrainskim šou talentaŭ VIDEA
Hetaja pieśnia pa-ŭkrainsku zavirusiłasia ŭ tyktoku. Akazvajecca, napisaŭ jaje biełarus
Biełarus staŭ pieramožcam konkursu pijanistaŭ u Ispanii