Abviaścili zbor srodkaŭ na stvareńnie sieryi dakumientalnych filmaŭ pra Alesia Adamoviča
25.11.2024 / 18:44
Inicyjatyŭnaja hrupa «Prypynak Adamoviča» zapuściła zbor srodkaŭ na stvareńnie sieryi dakumientalnych filmaŭ pra Alesia Adamoviča da 100-hodździa piśmieńnika.
Pieršy film płanujecca pryśviacić antyjadziernaj pazicyi piśmieńnika. Aproč taho, u płanach inicyjatyvy taksama inšyja temy, jakija padymaŭ Aleś Adamovič: antyvajennaja, tema represij i tema prymireńnia dy pakajańnia narodaŭ.
Inicyjatyŭnaja hrupa ŭžo sabrała i praciahvaje źbirać archiŭnyja fota i videa z tych časoŭ. Naprykład, udałosia źviazacca ź japonskimi arhanizacyjami i japonskaj aktrysaj Kamaki Kurychara, kab zapisać ich kamientary i ŭspaminy pra vizit Alesia Adamoviča ŭ Japoniju.
Taksama ŭžo jość damoŭlenaści ź inšymi ludźmi dla zapisu ich uspaminaŭ, ale niekatoryja ź ich znachodziacca ŭ stałym uzroście i majuć prablemy sa zdaroŭjem, tamu jość ryzyka nie paśpieć.
Na fota Aleś Adamovič i Kamaki Kurychara
Sabranyja srodki pojduć na nabyćcio abstalavańnia dla videazapisu, košt jakoha składaje kala 4000 jeŭra, na vydatki, źviazanyja z prajezdam i pražyvańniem zdymačnaj hrupy, bo zdymki buduć prachodzić u Japonii, Hiermanii, Polščy i inšych krainach. Akramia taho, nieabchodna apłacić aŭtarskija pravy za vykarystańnie asobnych materyjałaŭ i hanarary śpiecyjalistam.
Inicyjatyŭnaja hrupa «Prypynak Adamoviča» była stvorana ŭ studzieni 2018 hoda ŭ Biełarusi. Da 2020 hoda jana zmahła realizavać niekalki prajektaŭ pa zachavańni pamiaci Alesia Adamoviča. Adnak paśla 2020 hoda dziejnaść inicyjatyvy była vymušana prypyniena. Ciapier hrupa viartajecca, kab iznoŭ nahadać pra Alesia Adamoviča i aktualnaść jaho idej.