У мінскіх гандлёвых цэнтрах і кавярнях цяпер не будуць уключаць сусветныя навагоднія хіты. Затое даюць зарабіць праўладным артыстам
Мінскія арганізацыі гандлю і грамадскага харчавання атрымалі ад мясцовых уладаў указанні наконт навагодніх упрыгажэнняў. Учора стала вядома, як рэкамендуюць аздабляць навагоднія вітрыны. Але наконт фонавай музыкі для магазінаў і кафэ ў Мінгарвыканкама таксама ёсць пажаданні. Выданне «Люстэрка» вывучыла рэпертуар, які прапануюць уключаць для навагодняга настрою.
30.11.2024 / 19:46
Фота ілюстрацыйнае
Ніякага Last Christmas і расійскай «папсы»
Згодна з дакументам, які атрымала рэдакцыя, мелодыі трэба ўзяць з плэйліста, «сфармаванага Міністэрствам культуры». Да дакумента прыкладаецца спасылка на Google-дыск, дзе можна спампаваць больш за 160 трэкаў.
Скрыншот папкі ў сэрвісе Google Drive, з якой крамам і кавярням прапануюць спампоўваць навагоднюю музыку
Песні падзеленыя па чатырох групах:
«Дарослыя савецкія». Напрыклад, песня «Тройка» ў выкананні Ларысы Долінай і «Пяць хвілін» Людмілы Гурчанкі;
«Народныя». Ёсць беларускія песні кшталту «Гэй, Каляда!» і «Добры вечар». Ёсць і рускія народныя — «Варажба» і «Зіма»;
«Эстрада дарослыя». Гэта зборнік поп-песень, так ці інакш звязаных з Новым годам, зімой ці снегам. Выканаўцы — выключна прадстаўнікі беларускай эстрады, якія не адзначыліся крытычнымі выказваннямі на адрас беларускіх уладаў. У плэйлісце — «Верасы», Жанет, «Аўра», Вікторыя Алешка, Пятро Ялфімаў, Ірына Дарафеева, арт-гурт «Беларусы» і многія іншыя.
Скрыншот папкі ў сэрвісе Google Drive, з якой крамам і кавярням прапануюць спампоўваць навагоднюю музыку
«Эстрада дзеці». Дзіцячыя кампазіцыі кшталту «Снеговик — нос морковкой» і «Маленькой елочке холодно зимой». У некаторых файлах захаваліся даныя пра сайты, з якіх яны былі спампаваныя (напрыклад, detskie-pesni.com).
Больш у спісе нічога няма. У папку не трапіла ніводнай англамоўнай кампазіцыі. Напрыклад, там няма папулярных Jingle Bells, Carol Of The Bells або All I Want for Christmas Is You ад Мэрая Кэры альбо Last Christmas дуэта Wham!
Няма ў спісе ні ўкраінскіх, ні расійскіх, ні польскіх, ні іншых выканаўцаў.
Самы часты выканаўца
Цікава, што ў 25 са 164 файлаў (гэта значыць, у 15%) у назвах фігуруе слова «Хвілінка». Мяркуючы па ўсім, гэта музыка, якую выконваюць удзельнікі «Майстэрні эстраднага мастацтва «Хвілінка».
Скрыншот назваў файлаў, у назве якіх фігуруе слова «Хвілінка» са спісу, складзенага Міністэрствам культуры
Самі файлы ў папку на Google-дыск загружаў гукарэжысёр з Мінска Яраслаў Фамбараў (гэта можна зразумець па яго ніку і фота). На яго старонцы ва «ВКонтакте» пазначана, што ён працуе ў тэатры эстрады. А вось ягоныя бацькі ўзначальваюць студыю «Хвілінка». Тата, Яўген Фамбараў — кіраўнік, мама, Таццяна Панова — мастацкі кіраўнік.
Цяпер «Хвілінка» цесна звязаная з уладамі. Менавіта яна праводзіла канцэрты на выбарчых участках у Мінску ў адзіны дзень галасавання 25 лютага 2024 года (сума кантракту на пляцоўцы дзяржзакупак пазначаная як 264 575 рублёў). А цяпер, мяркуючы па сацсетках майстэрні, яе ўдзельнікі актыўна выступаюць на мерапрыемствах «Марафону адзінства».
Паводле беларускіх законаў, за выкарыстанне фонавай музыкі ў кавярнях і крамах трэба плаціць. Каб не шукаць усіх праваўладальнікаў паасобку, арганізацыі могуць заключыць дамову з Нацыянальным цэнтрам інтэлектуальнай уласнасці. Гэты цэнтр збірае ўзнагароджанне за выкарыстанне музыкі і перадае яго аўтарам і іншым праваўладальнікам. Цяжка сказаць, наколькі цяпер гэта масавая практыка.
Як паказала праверка «Люстэрка», песня «Маленькой елочке холодно зимой» з сайта «Детские песни» не ўваходзіць у «пералік твораў і іншых аб'ектаў, маёмасныя правы ў дачыненні да якіх знаходзяцца ў калектыўным кіраванні НЦІУ» — верагодна, аўтарскія выплаты за яе цэнтр не запатрабуе. А вось песні студыі «Хвілінка» ў гэтым рэестры ёсць, як і песні Вікторыі Алешкі, гурта «Аўра» і іншых беларускіх поп-выканаўцаў.
Мінскія ўлады прадпісваюць упрыгожваць навагоднія вітрыны толькі «элементамі славянскага паходжання»
У Dana Mall зноў зрабілі вельмі прыгожую навагоднюю інсталяцыю ФОТЫ
Стала вядома, колькі сёлета давядзецца заплаціць за натуральную навагоднюю ялінку
У грамадскім транспарце ў Мінску можна будзе адправіць ліст Дзеду Марозу
Навагоднія кірмашы ў Мінску адкрыюцца праз два тыдні
Стала вядома, калі запаляць агеньчыкі на елцы на Кастрычніцкай плошчы
У Мінску з'явілася казачна прыгожая навагодняя лакацыя
Ёлачны кірмаш у Мінску адкрыецца 16 снежня
Стала вядома, як сёлета будуць выглядаць навагоднія елкі ў Мінску ФОТЫ