Biełaruskaja kuchnia za hod pahoršyła svaje pazicyi ŭ śviecie
Daviednik pa nacyjanalnych stravach krain śvietu TasteAtlas abnaviŭ svoj štohadovy rejtynh najlepšych nacyjanalnych kuchniaŭ. Vydańnie Telegraf.news piša, na jakim miescy apynułasia Biełaruś i jakija tradycyjnyja stravy karystalniki partała rekamiendavali ŭsim abaviazkova pakaštavać u Biełarusi.
12.12.2024 / 17:58
Fota ilustracyjnaje
Sioleta Biełaruś, u paraŭnańni ź minułym hodam, apuściłasia na čatyry pazicyi i apynułasia na 75 miescy. Pry hetym acenku nacyjanalnaj kuchni našaj krainy składalniki rejtynhu, naadvarot, padniali — z 3,99 da 4 bałaŭ ź piaci mahčymych.
TasteAtlas — heta ekśpierymientalny anłajn-daviednik pa nacyjanalnych stravach krain śvietu, jaki złučyŭ u sabie elemienty takich papularnych servisaŭ, jak hid Michelin abo Tripadvisor. Na płatformie, zapuščanaj u 2015 hodzie charvackim žurnalistam i pradprymalnikam Macijaj Babičam, sabranyja sapraŭdnyja recepty nacyjanalnych straŭ, ahlady i daśledavańni pa praduktach charčavańnia, acenki krytykaŭ i vodhuki naviedvalnikaŭ restaranaŭ u roznych kutkach śvietu. Pa prybliznych acenkach, na partale ŭžo sabrana infarmacyja pra 10 tysiač straŭ, napojaŭ i inhredyjentaŭ, a taksama pra 9 tysiač ustanoŭ.
Jakija stravy «abaviazkovyja» dla tych, chto pryjazdžaje ŭ Biełaruś?
U śpisie «abranych» składalnikami rejtynhu kaviarniaŭ i restaranaŭ tradycyjnaj biełaruskaj kuchni apynulisia try staličnyja ŭstanovy, a siarod najlepšych praduktaŭ i vytvorcaŭ apynułasia biełaruskaja harełka.
Što da samoj ježy, to ŭ top-3 samych papularnych biełaruskich napojaŭ trapili krambambula, starka i kvas, a ŭ top-10 biełaruskich straŭ, jakija abaviazkova rekamiendujuć pakaštavać turystam, jakija pryjazdžajuć u krainu ŭpieršyniu, składalniki rejtynhu ŭklučyli nastupnyja:
- žur,
- draniki,
- chaładnik,
- syrniki,
- mačanka,
- vieraščaka,
- łazanki,
- piačysta,
- poliŭka,
- bankucha.
A što susiedzi?
Darečy, kuchni ŭsich krain-susiedak Biełarusi ŭ sotniu «najlepšych u śviecie» taksama trapili, zbolšaha jany ceniacca vyšej za biełaruskuju.
11-je miesca — Polšča z kašubskimi truskałkami, vierasovym miodam i varenikami;
34-je miesca — Rasija ź jaje šašłykom, miedavikom i blinami;
39-je miesca — Litva ź jaje tradycyjnymi hrenkami, kałdunami i syrnikami;
44-je miesca — Ukraina z varenikami, syrnikami i pampuškami;
79-je miesca — Łatvija z tvarožnymi bułačkami i aładkami dy ichnim varyjantam dranikaŭ.
A voś pieršaje miesca ŭ hetym hodzie dastałasia Hrecyi, jakaja zavajavała sercy karystalnikaŭ «kulinarnaha atłasa» fistaškami, finikami i aliŭkavym alejem.
Na druhim miescy — Italija ź jaje picaj, parmiezanam i džandujaj.
Na trecim — Mieksika z kiesabiryjaj i vostraj tamatnaj salsaj.
U Homieli adkryli biełaruskamoŭny fast-fud
Dyrektar «Prezident-hatela» nazvaŭ biełaruskuju stravu, jakuju lubiać kiraŭniki inšych krain
Čarhovy tryumf chaładnika. Historyja i recepty samaj letniaj stravy