«Heta najlepšaja viersija Trampa». Amierykanskaja žurnalistka apisała, jak zamach na Trampa hłyboka źmianiŭ jaho i nadaŭ spakoju
Zvyčajna novaabranyja prezidenty ZŠA da momantu inaŭhuracyi nie asabliva prajaŭlali siabie. Jany cicha zajmalisia padboram kamandy. Tak było, naprykład, u 2016 hodzie, kali Donald Tramp upieršyniu vyjhraŭ vybary, pryhadvaje Pehi Nunan na staronkach The Wall Street Journal. Ale ciapier nibyta ŭsio inakš.
14.12.2024 / 22:39
Donald Tramp padčas adnaho ź pieradvybarčych mierapryjemstvaŭ, pryblizna miesiac paśla zamachu. Fota: Bill Pugliano / Getty Images
Spadarynia Nunan, jakaja ŭ svoj čas pracavała ŭ Biełym domie jak asistentka i śpičrajtarka Ronalda Rejhana, dobra znajomaja ź pisanymi i niapisanymi praviłami, jakija dziesiacihodździami kultyvavalisia ŭ najvyšejšych ešałonach amierykanskaj ułady.
Dyk voś — kaža jana — hetym razam usio inakš.
Heta Tramp lacić u Paryž na cyrymoniju adkryćcia Sabora Paryžskaj Božaj Maci, dzie jaho prymajuć jak dziejnaha kiraŭnika dziaržavy.
Heta jon pravodzić aficyjnyja sustrečy z Uładzimiram Zialenskim ci Emanuelem Makronam.
Heta ź im śpiašajecca sustrecca premjer-ministr Kanady Džaścin Trudo, kab abmierkavać pytańnie mahčymych taryfaŭ na kanadskija tavary. Kali ŭ Siryi padaje dyktatura, to nie Bajden, a Tramp imhnienna reahuje: «Heta nie naša bitva. Nie ŭmiešvajemsia».
Bajden adreahavaŭ z zatrymkaj i aściarožnieńka («heta momant ryzyki i niapeŭnaści»), heta prahučyła blakła i niaŭciamna. «A ci byŭ kali taki momant u historyi hetaha rehijona, jaki b byŭ pazbaŭleny ryzyki i niapeŭnaści?» — rytaryčna pytaje Nunan.
Navat naminacyi na pasady, jakija raniej nie vyklikali asablivaj cikavaści, ciapier stanoviacca temami dla šyrokaha abmierkavańnia. Takija asoby, jak Iłan Mask, źjaŭlajucca na Kapitalijskim uzhorku, «dzie ich sustrakajuć jak hierojaŭ sajuźnickich dziaržaŭ».
«Donald Tramp nie zasłaniŭ Džo Bajdena; jon zaćmiŭ jaho», — kanstatuje Nunan.
Tramp źmianiŭsia: staŭ spakojny i ŭpeŭnieny
Tyja, chto dobra viedaje Trampa, adznačajuć, što Tramp mocna pamianiaŭsia. Zamach na jahonaje žyćcio nibyta nadaŭ jamu spakoju i ŭnutranaj uraŭnavažanaści.
Paśla druhoha niaŭdałaha zamachu, hetym razam na jaho holf-kłubie, jon uśviadomiŭ, što jon uratavany. «Hetaja realnaść nie zrabiła jaho ścipłym u zvykłym sensie, ale nadała spakojnuju ŭpeŭnienaść», — piša Nunan, spasyłajučysia na razmovy ź ludźmi z najbližejšaha atačeńnia Trampa.
Aprača taho, Tramp usprymaje svajo viartańnie da ŭłady nie prosta jak pieramohu na vybarach, a jak adpłatu. Sudovyja spravy, abvinavačańni, impičmienty — nibyta historyja nie pakidała jamu šansaŭ. Adnak jon nie tolki vyžyŭ, ale i viarnuŭsia.
«Ciapier jon dakładna viedaje, čaho choča: zdarovaja mihracyjnaja palityka, aktyvizacyja enierhietyki, skaračeńnie padatkaŭ», — cytuje žurnalistka adnaho sa svaich surazmoŭcaŭ.
Tyja, chto sustrakajecca ź im, kažuć, što «śviet, mahčyma, pabačyć najlepšuju viersiju Donalda Trampa».
Jon pieražyŭ palityčnyja bury, kuli i jurydyčnyja bitvy i vyjšaŭ nie złomleny, a zahartavany. U im prajaviłasia novaja ŭpeŭnienaść, jakaja časta naradžajecca paśla sustrečy sa śmierciu.
Tramp: Adziny sposab spynić vajnu — nie pakidać Ukrainu
Časopis Time abviaściŭ Trampa Čałaviekam hoda
Zialenski: My z Trampam havaryli pra zamarozku vajny