Дырэктар дзяржаўнага прадпрыемства казаў, што прасцей за ўсё працаваць па законе. Цяпер яго судзяць за хабар
Руслан Міхалевіч узначальваў «Бел НДЦ «Экалогія», якое ўваходзіць у структуру Міністэрства прыродных рэсурсаў.
01.01.2025 / 17:07
Вокладка часопіса «Дело», №7 за 2023 год з выявай Руслана Міхалевіча
Руслан Міхалевіч адвучыўся ў БДУ на геаэколага. Пасля працаваў у Міністэрстве прыродных рэсурсаў і аховы навакольнага асяроддзя, узначаліў адно з яго ўпраўленняў. А з 2018 стаў дырэктарам дзяржаўнага прадпрыемства «Бел НДЦ «Экалогія».
Прадпрыемства праводзіць даследаванні ў галіне аховы навакольнага асяроддзя і прыродакарыстання. Таксама яно адказвае за інфармацыйныя рэсурсы, якія належаць Мінпрыроды.
Год таму Міхалевіч даваў вялікае інтэрв'ю часопісу «Дело». Там ён распавядаў, што кампанія шмат працуе з бізнэсам, з'яўляецца «на 100% камерцыйнай» і не мае фінансавання ад дзяржавы.
Руслан Міхалевіч падчас інтэрв'ю ў сакавіку 2024 года. Скрыншот тэлеканала СТБ
«Да нас добраахвотна звяртаюцца бізнэсоўцы для распрацоўкі, падрыхтоўкі і афармлення дакументацыі, усе гэтыя працэдуры мы праводзім платна <…> Мы гарантуем, што ўсё будзе добрасумленна. Калі ты не спецыяліст, то лепш патраціць болей, але атрымаць максімальна карысную інфармацыю ў сферы. Мы паказваем, што прасцей за ўсё працаваць па законе», — сцвярджаў тады Міхалевіч.
Суд над ім пачнецца 8 студзеня 2025 года ў судзе Ленінскага раёна Мінска. Міхалевіча вінавацяць па самай цяжкай частцы артыкула «атрыманне хабару» (ч. 3 арт. 430). Яму пагражае да 15 гадоў калоніі з буйным штрафам.
Кіраўніка кантрольнага ўпраўлення Міністэрства па падатках і зборах злавілі на атрыманні хабараў
Намесніцу кіраўніка Талачынскага райвыканкама судзяць за хабар. Пагражае да 15 гадоў