Суд адмовіўся аднавіць на працы аўтара «Гродназнаўства» Андрэя Чарнякевіча
Ленінскі раённы суд Гродна адхіліў пазоў гісторыка Андрэя Чарнякевіча, які імкнуўся аднавіцца на працы ў Гродзенскім універсітэце.
Суддзя Жукоўская пастанавіла, што падставаў для перагляду гэтага рашэння няма.
Спрабаваць аднавіцца на працы далей — бессэнсоўна, сказаў сам Андрэй Чарнякевіч, кандыдат гістарычных навук.
Ён быў звольнены ў верасні з Гродзенскага ўніверсітэта імя Янкі Купалы, дзе займаў пасаду дацэнта, «за парушэнне працоўнай дысцыпліны». Андрэй Чарнякевіч — адзін з аўтараў падручніка «Гродназнаўства», што быў выдадзены «Гарадзенскай бібліятэкай».
Справа займела ў Інтэрнэце вялікі рэзананс, на сайце «Нашай Нівы» за Андрэя было сабрана каля 400 подпісаў (падпісанне ініцыявалі гродзенскія гісторыкі Алесь Краўцэвіч і Алесь Смалянчук), але далей справа не пайшла.