Міністр Снапкоў абяцае ў наступным годзе заробак у 700 даляраў
Пра гэта міністр эканомікі Мікалай Снапкоў заявіў падчас прамой лініі ў газеце «Рэспубліка».
— Мікалай Генадзевіч, а зарплата $700 будзе ў наступным годзе?
— Думаю, без праблем. Тое, што змогуць заплаціць прадпрыемства, то і заплацяць.
— А што рабіць бюджэтнай сферы?
— Бюджэтная сфера будзе традыцыйна падцягвацца. Там зарплаты звычайна складаюць 80% ад заработнай платы ў рэальным сектары. То бок будзе расці зарплата ў рэальным сектары эканомікі — будзем падцягваць і бюджэтнікаў, а не наадварот. А то часам кажуць: вось бюджэтнікам падвысяць, тады ў рэальным сектары падымем. Гэта не зусім правільна, усё наадварот.