Facebook змяняе правілы прыватнасці: цяпер забараняецца хаваць свой профіль
Самая вялікая ў свеце сацыяльная сетка забараняе сваім карыстальнікам хаваць свой профіль.
Таксама карыстальнік не зможа забараніць выводзіць свой профіль у выніках пошуку, які робяць іншыя карыстальнікі, паведамляюць СМІ.
Раней карыстальнікі маглі закрываць свой профіль, каб яго не бачылі пошукавыя сістэмы і не выводзілі ў сваіх выніках. Аднак пасля запуску ўласнай пошукавай функцыі Graph Search уладальнікі старонак у Facebook былі пазбаўленыя такой магчымасці.
У Facebook тлумачаць, што пошук Graph Search заснаваны пераважна на звестках, паказаных у профілі. І калі значная колькасць карыстальнікаў закрыюць гэтыя звесткі для пошуку, вынікі пошукавай выдачы будуць непаўнавартасныя. Дарэчы, раней паведамлялася, што забаронай для пошукавых сістэм карысталіся каля 100 мільёнаў чалавек.