Двум 17-гадовым угоншчыкам «жыгулёў» з Быхава пагражае да 5 гадоў турмы
Супрацоўнікі міліцыі затрымалі ў Быхаве двух 17-гадовых мясцовых жыхароў, якія скралі аўтамабіль ВАЗ-21013.
Уладальнік машыны пакінуў яе на ноч каля свайго дома, а раніцай пабачыў, што транспартнага сродку няма. Быхавец звярнуўся ў міліцыю, і ўжо праз паўтары гадзіны аўто было знойдзена ў мікрараёне Колас. Высветлілася, што ўначы на чужым аўтамабілі захацелі пакатацца двое 17-гадовых прыяцеляў, адзін з якіх, дарэчы, раней ужо быў судзімы за крадзяжы, таму без праблем здолеў завесці машыну.
Пасля начной паездкі зламыснікаў аўтамабіль не пацярпеў.
У дачыненні да згоншчыкаў Быхаўскага раёна аддзелам Следчага камітэта заведзена крымінальная справа. Ім пагражае да 5 гадоў пазбаўлення волі.