Бубка вырашыў балатавацца ў прэзідэнты МАК
Старшыня Нацыянальнага алімпійскага камітэта Украіны, шматразовы чэмпіён свету па скачках з шастом Сяргей Бубка абвясціў, што вырашыў балатавацца на пасаду прэзідэнта Міжнароднага алімпійскага камітэта.
Ён абвясціў пра гэта падчас міжнароднага спартыўнага форуму SportAccord у Санкт-Пецярбургу, бо менавіта ў гэтым горадзе у 1983 г. пачаў міжнародную спартыўную кар’еру, паведамляе Радыё Свабода
Сяргей Бубка ўзначальвае НАК Украіны з 2005 года і яшчэ з 1999-га з'яўляецца членам МАК. Цяпер ён член Выканаўчага камітэта МАК.
Бубка, алімпійскі чэмпіён па скачках з шастом, усталяваў 35 сусветных рэкордаў і 10 разоў выйграваў чэмпіянат свету па лёгкай атлетыцы.
Выбары прэзідэнта МАК адбудуцца 10 верасня ў Буэнас-Айрэсе. Ад 2001 г. МАК узначальвае бельгіец Жак Раге.