Трымаюць у жалезнай клетцы: у Віцебску працягваецца суд над Андрэем Гайдуковым — дзень другі

абноўлена

Паводле звестак з cуда, у судовай зале яго трымаюць у жалезнай клетцы, -- паведамляе Радыё Свабода.

Праваабаронца Павал Левінаў і актывістка БХД Таццяна Севярынец 13 чэрвеня мелі размову з старшынёй Віцебскага абласнога суда Мікалаем Хамічонкам. Актывісты кажуць, што бачылі, як у судовае пасяджэнне па справе Гайдукова выклікалі сведак у міліцэйскай форме.

Мікалай Хамічонак прызнаў, што 12 чэрвеня была зробленая памылка, калі ў інфармацыі аб працэсе над Андрэем Гайдуковым не было пазначана, што працэс будзе закрыты і чаму прынятае такое рашэнне. «Суддзя Урбановіч, якая вядзе працэс, закрыла яго на той падставе, што ў справе фігуруюць нейкія дзяржаўныя сакрэты», — паведаміў П.Левінаў.

Працэс над Андрэем Гайдуковым аднавіўся каля 10-й раніцы, ён па-ранейшаму закрыты. І нават тым, хто прыйшоў у суд на іншыя пасяджэнні, забаронена перасоўвацца па будынку самастойна.

***

У Віцебску працягваецца суд над 23-гадовым Андрэем Гайдуковым, якога вінавацяць у здрадзе дзяржавы.

Працэс пачаўся ў сераду, 12 чэрвеня, у будынку абласнога суда Віцебска.

Напачатку ў залу суда не прапускалі ні сваякоў, ні журналістаў. Больш за тое, журналістам невядомыя ў цывільным актыўна заміналі весці здымкі нават каля суда.

Але як расказала карэспандэнту «НН» грамадская дзяячка Таццяна Севярынец у другой палове дня высветлілася, што ў залу суда заходзіць можна.

«Я каля 3-й гадзіны вярнулася да суда, -- зазначае сп. Таццяна. — Зайшла ў будынак да дзяжурнага, спытала, ці ідзе яшчэ суд. Той адказаў, што ідзе». Жанчына на ўсялякі выпадак пацікавілася, ці няма зменаў і ці будзе суд заўтра адкрытым. «І тут падае голас той ахоўнік, які выганяў нас усіх з будынку, быццам бы не чуе: «А ён і не быў закрыты!» Я анямела. «А чаго ж вы нас не пусцілі ўранні?» — А хто вас не пускаў?«raquo;.

Напярэдадні Таццяна Севярынец атрымала ад Андрэя Гайдукова ліст (ранейшыя не прапускаліся цэнзурай), у якім хлопец апісаў, у чым яго вінавацяць: «Я абвінавачваюся ў тым, што мог пагражаць нацыянальнай бяспецы, што характарызуецца як замах на канстытуцыйны лад Рэспублікі Беларусь; навязванне Рэспубліцы Беларусь палітычнага курсу, які не адпавядае яе нацыянальным інтарэсам. Характар магчымай шкоды можа выражацца ў дэстабілізацыі сацыяльна-палітычнай сітуацыі. У тым, што шукаў фінансаванне на сваю дзейнасць у фондзе пасольства ЗША (ЦРУ ЗША па версіі КДБ)».

* * *

23-гадовы Андрэй Гайдукоў, які працаваў аператарам на Наваполацкім НПЗ «Нафтан», быў затрыманы 8 лістапада 2012 года;

Па арт. 356 Крымінальнага кодэкса (здрада дзяржаве ў форме правядзення агентурнай дзейнасці) Гайдукову пагражае ад 7 да 15 гадоў пазбаўлення волі.

Андрэй Гайдукоў з’яўляецца лідарам незарэгістраванага грамадскага аб`яднання «Саюз маладых інтэлектуалаў» і актывістам аргкамітэта па стварэнні партыі «Беларуская хрысціянская дэмакратыя» (БХД).

Каментары да артыкула