Следчы камітэт: Дырэктара «Планеты» не затрымлівалі. Наадварот, міліцыянты прыбылі, каб уратаваць яго

Следчы камітэт абверг меркаванне некаторых суседзяў дырэктара мінскага гатэля «Планета», што ён выкінуўся з балкона, калі яго прыбылі затрымліваць спецназаўцы.

«Ніякіх крымінальных спраў у дачыненні да гэтай асобы ў Следчым камітэце не было і няма. Яго ніхто не збіраўся затрымліваць», — паведамілі ў аддзеле інфармацыі і сувязяў з грамадскасцю Следчага камітэта.

Паводле папярэдняй інфармацыі следчых, да дома на вуліцы Садовай, дзе жыў нябожчык, у дзень трагедыі сапраўды двойчы выязджала аператыўная група супрацоўнікаў міліцыі. Але яе выклікалі суседзі.

«Суседзі патэлефанавалі на нумар 102 і паведамілі, што на парэнчах балкона на 8-м паверсе сядзіць мужчына і збіраецца кульнуцца ўніз. Праз некалькі хвілін прыбыла апергрупа, але яна нікога не выявіла, — паведамілі ў Следчым камітэце. — Праз нейкі час суседзі нябожчыка зноў патэлефанавалі ў міліцыю і зноў паведамілі, што мужчына сядзіць на парэнчах балкона. Міліцыянты вылічылі нумар кватэры і пачалі падымацца на 8 паверх. У гэты час мужчына зваліўся з восьмага паверха».

Цяпер над справай працуюць следчыя, праводзіцца судова-медыцынская экспертыза, адпрацоўваюцца ўсе версіі.

Каментары да артыкула