Канферэнцыя, прысвечаная стагоддзю «Вянка» — дэдлайн 1 лістапада
У 1913 годзе ў Вільні ў друкарні Марціна Кухты выйшаў зборнік вершаў Максіма Багдановіча «Вянок. Кніжка выбраных вершаў», які паэту дапамаглі выдаць супрацоўнікі першай беларускай газеты «Наша Ніва».
Без перабольшання, гэтая кніга — вяршыня беларускай лірыкі пачатку ХХ стагоддзя.
Сам паэт пазней у лісце да беларускай пісьменніцы Ванды Лявіцкай пісаў: «Недахватаў розных — гібель, ды кніжка гэта зусім маладая: вершы яе пісаліся з паловы 1909 да паловы 1912 гг., калі мне было 17−20 год. Але ў ёй усё ж такі ёсць і творчасць, і натхненне, і сур’ёзная праца».
2013 год адзначаны слаўным юбілеем – 100 год «Вянку».
Літаратурны музей Максіма Багдановіча ў Мінску кожныя два гады арганізоўвае і праводзіць міжнародныя навукова-практычныя канферэнцыі. Сёлета, а дакладней 26 лістапада 2013, адбудзецца чарговая канферэнцыя «Кніга новага жыцця», прысвечаная 100-годдзю адзінага прыжыццёвага зборніка вершаў М. Багдановіча.
Да ўдзелу ў канферэнцыі запрашаюцца літаратуразнаўцы, мовазнаўцы, культуролагі, гісторыкі, мастацтвазнаўцы, музейныя спецыялісты, сфера навуковых інтарэсаў якіх звязаная з вывучэннем і інтэрпрэтацыяй розных аспектаў жыцця і творчасці Максіма Багдановіча. Таму ўсім ахвотным узяць удзел у канферэнцыі арганізацыйны камітэт прапануе даслаць сваю заяўку на электронны адрас музея bagdanovich@tut.by да 1 лістапада 2013 года.
Усю дадатковую інфармацыю можна знайсці на сайце Літаратурнага музея Максіма Багдановіча: www.bagdanovich.by.