Навальны адмовіўся ад удзелу ў «Рускім маршы»
У сваім блогу ён патлумачыў, што адчувае вялікі груз адказнасці пасля выбараў мэра Масквы.
Аляксей Навальны наведвае «Русскіе маршы» з 2007 года. Фота Васілій Шапашнікаў/Коммерсант.
Расійскі апазіцыйны палітык Аляксей Навальны заявіў, што не будзе ўдзельнічаць у шэсці нацыяналістаў «Рускі марш», які адбудзецца ў маскоўскім раёне Любліна 4 лістапада, паведамляе Бі-бі-сі.
У сваім блогу ён патлумачыў, што адчувае вялікі груз адказнасці пасля выбараў мэра Масквы, на якіх ён заняў другое месца. Пры гэтым Навальны заявіў, што па-ранейшаму падтрымлівае ідэю «Рускага маршу» і заклікаў тых, каму блізкія мэты гэтай акцыі, прыйсці на яе.
Навальны наведваў гэтыя акцыі з 2007 года, але ў мінулым годзе прапусціў «Рускі марш», спаслаўшыся на грып. Сімпатыі апазіцыянера да нацыяналістаў выклікаюць занепакоенасць у часткі яго патэнцыйных прыхільнікаў.
У гэтым годзе арганізатары «Рускага маршу» планавалі сабраць 30 тысяч удзельнікаў, аднак улады ўзгаднілі шэсце і мітынг з удзелам толькі 15 тысяч чалавек.
Шэсце нацыяналістаў пройдзе на фоне вялікага грамадскага рэзанансу, выкліканага беспарадкамі ў Бірулёва.