Беларускія баскетбалісткі – у паўфінале чэмпіянату Эўропы
У чвэрцьфінале беларускі перамаглі чэмпіёнак Эўропы зборную Чэхіі зь лікам 52:46. Cупэрпосьпех нашых дзяўчат, якія сёлета дэбютавалі на першынстве кантынэнту.
У чвэрцьфінале чэмпіянату Эўропы па баскетболе, што праходзіць у Італіі, беларускі (галоўны трэнер – Анатоль Буяльскі) перамаглі чэмпіёнак кантынэнту зборную Чэхіі зь лікам 52:46.
Найлепшымі ў нашай зборнай былі Алена Леўчанка і Натальля Марчанка. Яны набралі па 11 балаў. Лік па чвэрцях: 11:15, 20:12, 8:14, 13:5.
Паўфінал адбудзецца ў суботу, 6 кастрычніка. Супернік вызначыцца ў пятнічным матчы Бэльгія – Гішпанія.
Цікава, што ў посьпех на чэмпіянаце беларускай зборнай мала хто – апроч дзяўчат і трэнера – верыў. Нават у фэдэрацыі квіткі на зваротную дарогу замовілі на пятніцу.
Нашыя ня толькі выйшлі ў чвэрцьфінал (задача – максімум), але й прабіліся ў паўфінал, што азначае таксама аўтаматычнае трапляньне ў кваліфікацыю на алімпійскія гульні ў Пекіне.
Зазначым, што сёлета беларуская зборная ўпершыню дэбютавала на чэмпіянаце кантынэнту.