Цімашэнка паедзе ў Нямеччыну на лячэнне
Экс-прэм'ер Украіны Юлія Цімашэнка прыняла прапанову канцлера Германіі Ангелы Меркель правесці лячэнне ў клініцы «Шарытэ».
Пра гэта па выніках тэлефоннай размовы дзвюх палітыкаў, якая адбылася 23 лютага, паведаміла прэс-служба Цімашэнка.
«Падчас тэлефоннай размовы Меркель пажадала Цімашэнцы хутчэйшага выздараўлення і прапанавала правесці лячэнне ў клініцы «Шарытэ». Цімашэнка прыняла прапанову Меркель. Яна плануе наведаць саміт Еўрапейскай народнай партыі, а потым паедзе ў «Шарытэ» для неадкладнага лячэння», — гаворыцца ў заяве.
Цімашэнка большую частку заключэння знаходзілася ў шпіталі пад наглядам турэмшчыкаў, а не ў калоніі. Дактары з клінікі «Шарытэ», якія яе назіралі, казалі пра неабходнасць сур'ёзнага лячэння і заяўлялі пра гатоўнасць Нямеччыны прыняць экс-прэм'ера Украіны.