Германія прапануе пяць крокаў па вырашэнні крызісу ва Украіне
Міністр замежных спраў Германіі Франк-Вальтэр Штайнмаер прапанаваў план з пяці пунктаў для ўрэгулявання крызісу ва Украіне.
Пра гэта ён напісаў у артыкуле, апублікаваным у Frankfurter Allgemeine Zeitung.
Штайнмаер, у прыватнасці, прапануе пасрэдніцкую ролю АБСЕ і правесці другую сустрэчу «Жэнеўскай чацвёркі» (ЕС, ЗША, Расіі і Украіны).
«На сёння, на мой погляд, перадуcім важныя наступныя пяць крокаў», — адзначыў дыпламат.
Па-першае, Штайнмаер прапануе правесці другі раўнд чатырохбаковых перамоў па Украіне.
«Гэта было б магутным палітычным сігналам, што ўсе чатыры бакі сустрэчы ў Жэневе прызнаюць дамоўленасці і хочуць ўвасабляць іх у жыццё», — лічыць ён.
Па-другое, Штайнмаер падкрэсліў важнасць правядзення намечаных на 25 мая прэзідэнцкіх выбараў ва Украіне, якія «дэмакратычным спосабам узаконяць уладу новага ўкраінскага кіраўніцтва і паспрыяюць стабілізацыі палітычнай і эканамічнай сітуацыі ў краіне».
Па-трэцяе, ён прапануе ўзмацніць пасрэдніцкую ролю АБСЕ, у прыватнасці шляхам правядзення круглых сталоў і канферэнцый на нацыянальным, рэгіянальным і мясцовым узроўнях.
Па-чацвёртае, падкрэсліў нямецкі дыпламат, трэба весці дыскусію адносна канстытуцыйнай рэформы ва Украіне шляхам прыцягнення прадстаўнікоў усіх рэгіёнаў краіны і грамадскасці.
Пятым пунктам ён назваў «раззбраенне недзяржаўных груповак і вызваленне грамадскіх будынкаў».