У Мінску пачаліся Беларускія спеўныя сходы
6 траўня адбыўся Трэці спеўны сход. 50 чалавек у чарговы раз сабралася ў адной з музычных студый Мінска, каб паспяваць беларускія народныя песні.
Саліст гурту «Вурай» Сяргей Доўгушаў спачатку правёў з прысутнымі майстар-клас па дыханні. Удзельнікі рабілі практыкаванні, кожны знаходзіў свой рытм. Потым пачаліся распевачкі: яны былі простыя – кожны даў рады. Усё суправаджалася рытмічнай хадзьбой па студыі, груканнем нагамі – перад спевамі неабходна поўнасцю распаволіцца. Зрэшты, настройка на спевы нагадвае практываканні ёгаў па расслабленні цела і настройцы духа.
На двух папярэдніх Спеўных сходах удзельнікі ўжо вывучылі пяць песень, і таму спевы пачаліся з іх. Калі «спевакі» добра адчулі свой голас, узялі агульнае гучанне – прыйшоў час вывучэння новых музычных твораў. Імі сталі хлапечая «Дунаю-дунаю» і дзявочая «Калыханка».
Хлопцы спявалі дзяўчатам сваю песню, а потым – наадварот.
Напрыканцы Сходу перад удзельнікамі выступіў спецыяльны госць – гурт «Кудзьмень». Прагучала некалькі песень у беларускай народнай манеры выканання, адбыўся дуэт скрыпак.
Спеўны сход ачароўвае людзей.
Суарганізатар сходаў Аляксей Чубат запрашае на Сходы ўсіх ахвотных, як з музычнай адукацыяй, так і без яе.
Падпісацца на старонкі Сходаў вы можаце ў Facebook або Укантакце. Там жа ёсць відэа і тэксты песень.