Беларуская «філія РНЕ» збірае добраахвотнікаў для «праваслаўнай арміі Данбаса»
Зварот апублікаваны на сайце «Беларускай рэгіянальнай арганізацыі Рускага нацыянальнага адзінства (РНЕ)» 9 мая.
Яго рыторыка вытрыманая ў духу сённяшняй расійскай прапаганды. Звяржэнне Януковіча — «узброены пераварот, арганізаваны ЗША», сённяшняя ўкраінская ўлада — «хунта, якая складаецца з агентаў ЦРУ і бандэраўцаў». Далей ужо дух афіцыйнай беларускай прапаганды: «На Майдане было вельмі шмат БНФаўцаў. Украіну яны ўспрымаюць як плацдарм, пры дапамозе якога яны маюць намер перанесці пажар «каляровай рэвалюцыі» у Беларусь. Гэтага нельга дапусціць, бо гэта можа прывесці не толькі да вялікага кровапраліцця, але і да страты дзяржаўнага суверэнітэту…».
З логікай ёсць праблемы: гэта ж народжаная Майданам новая ўкраінская ўлада і спрабуе не дапусціць развалу краіны і страты суверэнітэту. Але ў прапагандзе логіка і праўда не абавязковая.
«Нашым праваслаўным братам на ўсходзе і паўднёвым усходзе былой Украіны патрэбна дапамога, бо супраць іх ваююць не толькі рэшткі былой рэгулярнай украінскай арміі, але і замежныя найміты, у тым ліку БНФаўцы», — сцвярджаецца ў звароце.
І пры канцы Беларуская рэгіянальная арганізацыя Рускага нацыянальнага адзінства (БРА РНЕ) аб'яўляе пра стварэнне «добраахвотніцкага атрада для арганізаванай дапамогі праваслаўным братам». Запісваюць мужчынаў, якія служылі ў войску.
Гэта першая ад пачатку 2000-х адкрытая спроба РНЕ стварыць у Беларусі незаконнае парамілітарнае фармаванне.
* * *
Як адзначаў Ігар Лялькоў у сваім аналізе прарасійскай пятай калоны ў Беларусі, прарасійскія нацысты ў Беларусі існуюць, але дзейнасць сваю не афішуюць і хаваюць у легальных зарэгістраваных арганізацыях спартовага ці культурніцкага накірунку.
З часу знішчэння на пачатку 2000-х структураў РНЕ ў Беларусі сапраўдныя парамілітарныя фармаванні ў гэтых асяродках не паўстаюць. Забойствы тагачасных лідараў расейскіх нацыстаў у Беларусі Глеба Самойлава і Максіма Брэйнара, а таксама шэраг крымінальных справаў сталі яскравым сігналам: нягледзячы на ўсю рыторыку пра славянскую еднасць, полем для дзейнасці ваенізаваных нацысцкіх арганізацыяў Беларусь не будзе.
XX