У АБСЕ паведамляюць, што іх назіральнікі да гэтага часу знаходзяцца ў палоне сепаратыстаў
26 мая ў Данецкай вобласці зніклі чацвёра міжнародных назіральнікаў, 29 мая — яшчэ чацвёра ў Луганскай вобласці.
Паводле дадзеных Арганізацыі па бяспецы і супрацоўніцтву ў Еўропе (АБСЕ), абедзве групы назіральнікаў захопленыя сепаратыстамі і знаходзяцца ў палоне. Пра гэта гаворыцца ў паведамленні АБСЕ, распаўсюджаным у суботу, 31 траўня, паведамляе «Нямецкая хваля».
Намеснік кіраўніка місіі назіральнікаў АБСЕ Аляксандэр Гуг заявіў, што ўсе распаўсюджаныя паведамленні пра нібыта вызваленне назіральнікаў не адпавядаюць рэчаіснасці. Паводле Гуга,
кантакту з назіральнікамі АБСЕ да гэтага часу няма.
Між тым расійскае агенцтва «Інтэрфакс» распаўсюдзіла ў суботу раніцай інфармацыю аб намерах сепаратыстаў абмяняць захопленых прадстаўнікоў АБСЕ на сваіх паплечнікаў. Суразмоўца агенцтва таксама сказаў, што прадстаўнікі АБСЕ да гэтага часу застаюцца на тэрыторыі, якую кантралююць сепаратысты.