Ніну Багінскую, якая спаліла савецкі сцяг каля КДБ, вызвалілі
Калі актывістка патлумачыла спецслужбам, навошта спаліла сцяг, супрацоўнікі КДБ выклікалі да яе псіхіятра.
Грамадскую актывістку Ніну Багінскую, якую затрымалі ўвечары 1 жніўня пасля спалення чырвонага сцяга каля будынка КДБ у Мінску, у ноч на 2 жніўня вызвалілі з Цэнтральнага РУУС, склаўшы на яе пратакол.
«У КДБ было ўсё вельмі проста: мяне затрымалі, пагаварылі. Я патлумачыла, чаму спаліла чырвоны сцяг зь сярпом і молатам — бо гэта сцяг, пад якім забівалі мільёны людзей, рабілі генацыд беларусаў.
І што 1 жніўня правяла сваю акцыю, таксама патлумачыла — бо ў гэты дзень ў 1937 годзе тут, ў дворыку турмы «амерыканкі» палілі кнігі нашых беларускіх пісьменнікаў і паэтаў, якія мы ужо ніколі не прачытаем.
Мяне слухалі і выклікалі для размовы са мной псіхіятра. Той са мной пагаварыў, і пасля я чула, як ён сказаў ім: «Тут усё нармальна».
Тады мяне адвезлі ў Цэнтральны РУУС, склалі пратакол аб маіх дзеяньнях і пакінулі сабе бутэлечку з газай, якой я змачыла сцяг, каб добра гарэла. Відаць, пакіінулі, як рэчавы доказ.
Але мне нічога не сказалі — будуць заводзіць справу ці не».