Беларусь і Польшча абмяркуюць перспектывы супрацоўніцтва ў галіне кантролю над узбраеннямі
У Мінск 19 жніўня прыбудзе група экспертаў Міністэрства абароны Польшчы. Пра гэта паведамілі ў Мінабароны Беларусі.
Група экспертаў прыбудзе ў Мінск для ўдзелу ў рабочай сустрэчы прадстаўнікоў узброеных сілаў Беларусі і Польшчы па ацэнцы выканання дамоўленасці аб наборы дадатковых да Венскага дакумента 2011 мер па ўмацаванні даверу і бяспекі, прынятых краінамі.
Узначаліць польскую групу начальнік аддзела па кантролі над раззбраеннем Дэпартамента па палітыцы міжнароднай бяспекі палкоўнік Роберт Цэпка. Кіраваць беларускай дэлегацыяй на перамовах будзе начальнік Нацыянальнага агенцтва па кантролі і інспекцыях — дэпартамента Міністэрства абароны Беларусі палкоўнік Юрый Чарнуха.
Бакі абмяркуюць сучасны стан і перспектывы далейшага развіцця супрацоўніцтва дзвюх дзяржаў у галіне кантролю над узбраеннямі.