Пенсіянеры супраць ноу-хау
Нястрымныя-3
Жанр: баявік, трылер, прыгоды
Рэжысёр: Патрык Х’юз
У ролях: Сільвестр Сталонэ, Джэйсан Стэтхэм, Мэл Гібсан, Харысан Форд, Антоніа Бандэрас, Дольф Лундгрэн, Арнольд Шварцэнэгер, Джэт Лі, Келан Латс
ЗША, Францыя, 126 хв.
Барні, Крыстмас і астатнія члены каманды падчас чарговай аперацыі сутыкаюцца з Конрадам Стоўнбэнксам, які шмат гадоў таму заснаваў разам з Барні каманду «Нястрымныя» і лічыўся загінулым. Цяпер Конрад гандлюе зброяй і з’яўляецца тым самым чалавекам, якога Барні было даручана забіць.
Стоўнбэнкс паставіў сабе мэту ліквідаваць «Нястрымных». Барні вырашае, што ў гэтай барацьбе «свежы» падыход можна супрацьпаставіць старым метадам, і папаўняе шэрагі маладзейшымі байцамі, тэхнічна больш падкаванымі. Новая місія ператвараецца ў сутыкненне паміж прадстаўнікамі старой школы і экспертамі ў высокіх тэхналогіях.
Баявік, які напоўніцу эксплуатуе класіку жанру, раней выязджаў за кошт акцёрскага складу і падтрымання духу гэтай класікі, губляе адваяваныя першай і другой часткамі пазіцыі.
Вартыя ўвагі хіба што вядомыя Сталонэ, Шварцэнэгер і Стэтхэм, сцэны з якімі нязменна глядзяцца з цікавасцю, бо распрацаваныя з чаканым гумарам. Набор «маладняка» не надаў фільму крамянасці, новым персанажам катастрафічна не хапае харызмы (сярод іх можна ўбачыць Келана Латса, зорку няўдалага «Геракла: Пачатак легенды» (2013)). Стужка адыходзіць ад заяўленай класікі з вядомымі пенсіянерамі жанру і ператвараецца ў сярэдненькі баевічок, якіх процьма здымаецца ў Галівудзе.
Аднак яшчэ да выхаду трэцяй часткі было заяўлена, што гледачоў чакае сіквел «Нястрымныя-4».