Наталія Арэйра выступіць у Мінску 14 снежня
Уругвайская спявачка і актрыса Наталія Арэйра наведае Беларусь ужо ў гэтым годзе. Зорка мыльных опер выйдзе на сцэну Палаца спорту 14 снежня, каб выканаць свае старыя і новыя песні, а таксама дадаць лацінаамерыканскай палкасці ў снежаньскі Мінск.
За акіянам Наталія Арэйра стала вядомай дзякуючы галоўным жаночым ролях у аргентынскіх серыялах «Багатыя і знакамітыя» і «Дзікі анёл». У Расіі дзейнічаюць дзясяткі фан-клубаў Наталіі, удзельнікі якіх актыўна сочаць за творчым жыццём любімай актрысы. У Беларусі таксама ёсць супольнасць прыхільнікаў 37-гадовай зоркі.
Mузычная дзейнасць Арэйра атрымала не меншую славу, чым акцёрская. Яна выпусціла 3 альбомы, адзін сінгл, напісала мноства саўндтрэкаў да фільмаў і серыялаў. Дыскі Арэйра былі прададзеныя па ўсім свеце мільённымі накладамі.
У мінулым годзе выступ Наталіі Арэйра адбыўся ў Маскве. Першапачаткова арганізатары запланавалі толькі адно шоу. Аднак адразу ж пасля анонсу прыхільнікі рынуліся раскупляць квіткі, і ўсім жадаючым іх не хапіла. У выніку ўлюбёнка публікі дала ажно тры канцэрты запар, два ў Маскве і адзін у Санкт-Пецярбургу. Ля гатэляў, дзе Наці спынілася са сваёй сям'ёй, кругласутачна дзяжурылі фанаты. На самім шоу прыхільнікі зладзілі флэш-моб: апрануліся ў чырвоныя кепкі набакір, як гераіня Мілаграс, якую грала Арэйра ў серыяле «Дзікі анёл».
8 фактаў пра Наталію Арэйра:
- Першая галоўная роля ў кіно — у карціне «Багатыя і знакамітыя» (1998).
- Актрыса з'яўляецца паслом добрай волі ЮНІСЕФ у Аргенціне і Уругваі.
- Разам са старэйшай сястрой Адрыянай акторка выпускае вопратку пад маркай Las Oreiro. На сённяшні дзень у Аргенціне адкрыта ўжо некалькі буцікаў гэтай маркі, плануецца адкрыццё ў Расіі і Ізраілі.
- Наталія замужам за рок-музыкам Рыкарда Молья. Іх сына клічуць Мерлін, яму амаль 3 гады. Зорка ўжо не раз брала яго з сабой на гастролі.
- Апошні час актрыса прысвяціла здымкам у новым серыяле «Толькі ты», які здымаўся год.
- Наталію Арэйра афіцыйна прызначылі «хроснай маці» зборнай Уругвая. Арэйра суправаджае футбалістаў у паездках, а часам нават ладзіць шоу перад важнымі матчамі.
- Актрыса вялікую ўвагу надае свайму здароўю і прытрымліваецца малочна-вегетарыянскай дыеты.