Нобелеўская прэмія па медыцыне прысуджана за адкрыццё ўнутранага GPS
на фота Май-Брыт і Эдвард Мозэр
Лаўрэатамі Нобелеўскай прэміі ў галіне фізіялогіі і медыцыны 2014 названы Джон О'Кіф, і нарвежскія вучоныя жонка і муж Май-Брыт і Эдвард Мозэр.
Пра гэта аб'явіў сёння Нобелеўскі камітэт, паведамляе сайт Нобелеўскай прэміі. Прэмія будзе ўручана за даследаванні клетачнай біялогіі галаўнога мозгу — за вывучэнне нейрафізіялагічных механізмаў арыентацыі ў прасторы (унутранае GPS).
У аўторак назавуць лаўрэата прэміі ў галіне фізікі, у сераду — хіміі, у чацвер — літаратуры, а ў пятніцу стане вядома, хто атрымае Нобелеўскую прэмію міру. У наступны панядзелак — у галіне эканомікі.
Нобелеўскую прэмію заснаваў шведскі інжынер і прадпрымальнік Альфрэд Нобель, завяшчаўшы на выплату прэмій велізарную маёмасць, якую яму прынесла, галоўным чынам, вынаходніцтва дынаміту.
Лаўрэаты атрымаюць па восем мільёнаў шведскіх крон — амаль 1,11 мільёна даляраў. Цырымонія ўручэння ўзнагарод традыцыйна адбудзецца пазней — у снежні. Яна пройдзе ў Стакгольме і Осла.
З 1901 да 2013 года прэмію атрымалі 876 чалавек і арганізацый. Кожны пераможца атрымлівае медаль, дыплом і грашовую ўзнагароду.
Кандыдатаў вылучаюць акадэмікі, універсітэцкія прафесары, навукоўцы, папярэднія нобелеўскія лаўрэаты, парламентарыі і грамадскія арганізацыі. Нобелеўскі камітэт не выдае імёнаў кандыдатаў — гэта могуць зрабіць толькі яны самі або тыя, хто іх намінаваў, паведамляе Бі-Бі-Сі.