Вірус Эболы пранік у Еўропу
Асцярожна, жорсткія фота хворага чалавека
Эболу выявілі ў медсястры, што лячыла іспанскага святара, які прывёз яе з Афрыкі. Гэта першы выпадак заражэння чалавека ад чалавека ў Еўропе. Дагэтуль заражаліся толькі еўрапейцы, што працавалі ў Заходняй Афрыцы.
Медсястру перавезлі ў шпіталь Мадрыда Hospital de Alcorcon. Асаблівую трывогу выклікае той факт, што яна працавала ў інфекцыйным шпіталі, прыстасаваным для барацьбы з Эболай.
Іспанскія ўлады заяўляюць, што падставаў для панікі няма, але пакуль не могуць патлумачыць, у чым прычына заражэння і дзе былі парушаныя каранцінныя працэдуры.
Медсястра была часткай каманды, якая лячыла іспанскага 69-гадовага манаха Мануэля Гарсія В'еху, што сам заразіўся, ратуючы хворых у Сьера-Леонэ. Уратаваць яго не ўдалося, ён памёр 25 верасня. Перад тым, у жніўні, памёр яшчэ адзін іспанскі святар.
У хворага на Эболу адкрываюцца шматлікія ўнутраныя крывацёкі, ён млее і дранцвее.
У медсястры тэмпература паднялася 30 верасня. Два аналізы пацвердзілі заражэнне Эболай. Пакуль стан яе здароўя застаецца стабільным. Тэмпература не перавышае 38,6 градуса — мяжа, пасля якой Эбола робіцца незваротнай.
Эбола перадаецца, калі ёсць прамы кантакт з вадкасцямі цела заражанага чалавека.
Цяпер іспанскія медычныя ўлады вызначаюць кола кантактаў заражанай медсястры. Вядома, што яна замужам і не мае дзяцей.
Усяго ў групу па лячэнні брата В'ехі ўваходзіла 30 дактароў і медработнікаў.
Раней іспанскія дактары не здолелі ўратаваць іншага святара-доктара, што захварэў на Эболу, працуючы ў бальніцы ў Ліберыі.
У зонах, ахопленых вірусам, трэба трымаць строгую гігіену. Катэгарычна нельга голым целам кантактаваць з вадкасцямі (сліня, кроў, мача і г.д.) з цела хворага ці іх слядамі.