Пажар на атамнай падлодцы ў Северадзвінску спынілі затапленнем дока
У Архангельскай вобласці на Северадзвінскім суднарамонтным заводзе «Зорачка» адбылося ўзгаранне на атамнай падлодцы. Гэта спушчаная на ваду ў 1992 годзе АПЛ Паўночнага флота К-266 «Арол» праекту 949А (шыфр «Антэй»).
ТАСС
Пажар на АПЛ «Арол» пачаўся каля 14.00 пры правядзенні агнявых работ, паведамляе ria.ru. Ядзернае паліва і зброю з падлодкі выгрузілі яшчэ да пачатку рамонту. У выніку інцыдэнту ніхто не пацярпеў.
Па словах прадстаўніка Аб'яднанай суднабудаўнічай карпарацыі Іллі Жытомірскага, цяпер ідзе «падрыхтоўка да запаўнення дока вадой, што павінна прывесці да канчатковага тушэння лодкі». Затапленне дока, у якім знаходзіцца лодка, можа заняць каля пяці гадзін.