Следства: Дактары «Ладэ» не вінаватыя ў гібелі пацыенткі
Следства не ўстанавіла віны работнікаў брэсцкага «Ладэ» ў гібелі пацыенткі ад анафілактычнага шоку. Пра гэта паведаміў начальнік упраўлення Следчага камітэта па Брэсцкай вобласці Аляксандр Рахманаў, піша БелТА.
Для ўстанаўлення ўсіх абставінаў смерці 21-гадовай берасцейкі ў маі 2014 года была прызначаная дадатковая комплексная экспертыза.
«Экспертная камісія рэспубліканскага ўзроўню не ўгледзела парушэнняў патрабаванняў нарматыўных дакументаў Міністэрства аховы здароўя і сваіх службовых інструкцый у дзейнасці супрацоўнікаў філіяла медцэнтра пры аказанні медыцынскай дапамогі дзяўчыне. У сувязі з гэтым мы прыйшлі да высновы, што няма падстаў гаварыць аб тым, што мела месца нейкае злачынства», — распавёў начальнік упраўлення.
Няшчасны выпадак адбыўся ў Брэсце 20 мая 2014 года. У бальніцу дзяўчыну даставілі 19 мая з медцэнтра, дзе ёй стала дрэнна падчас правядзення дыягнастычнай лекавай маніпуляцыі.