Баевікі «Ісламскай дзяржавы» захапілі антычны горад Пальміра
Баевікі «Ісламскай дзяржавы» (ІД) захапілі сірыйскі горад Пальміра, у якім знаходзяцца ўнікальныя антычныя разваліны.
Паводле інфармацыі праваабарончай групы «Сірыйская абсерваторыя па правах чалавека», баевікам удалося захапіць амаль увесь горад. Сірыйскія войскі адступілі.
Руіны Пальміры прызнаныя ЮНЕСКА помнікам Сусветнай спадчыны. У цяперашні час на месцы антычнага горада знаходзіцца вёска.
У канцы лютага групоўка выклала відэа, на якім баевікі руйнуюць на поўначы Ірака калекцыю статуй і скульптур. Узрост артэфактаў перавышае некалькі тысяч гадоў.