Velcom мы прадалі, аказваецца, за $600 млн
За дзяржаўнага апэратара сувязі «Бест», па словах А. Лукашэнкі, прапануюць мільярд даляраў.
За дзяржаўнага апэратара сувязі «Бест», па словах А. Лукашэнкі, прапануюць мільярд даляраў.
«Зусім нядаўна мы прадалі долю ў Беларусі ў VELCOM, усім вядомая кампанія. Мы ўвогуле туды нічога не ўклалі. Але каля 600 мільёнаў даляраў атрымалі за сваю долю. І гэта не кантрольны пакет акцыяў. Сёньня нам прапануюць ужо мільярды за кантрольны пакет іншай кампаніі. Я кажу: пачакайце, мы павінны МТС кантраляваць, там мы гаспадары, каб разбою не было на гэтым рынку. Сёньня за трэцяга апэратара — «БеСТ» — нам прапануюць мільярд, каб купіць яго з усімі пазыкамі. Падумаем,..», — цытуе Аляксандра Лукашэнку «Комсомольская правда в Белоруссии». Гэтыя заявы былі зробленыя ў часе наведваньня прэзыдэнтам 12 лютага новага корпуса БДУ на вуліцы Кальварыйскай.
Раней міністар сувязі заяўляў, што дзярждоля VELCOM была прададзеная больш чым за $500 млн, незалежныя экспэрты, зыходзічы з апублікаваных лічбаў даходаў бюджэту, называлі істотна меншую суму ўгоды — $290 млн.
У жніўні 2007 г. дзяржаўная доля VELCOM была прададзеная кіпрскай «SB Telecom». Пазьней 70% актываў кампаніі «МЛС», што на той момант ужо была ў статусе замежнага ПУП, кіпрыёты прадалі аўстрыйскай Telekom Austria за 730 млн эўра.
Нагадаем, што на пачатку лютага вынікі дзейнасьці за мінулы год апэратараў сотавай сувязі «БеСТ» і «БелСел» выклікалі крытыку з боку намесьніцы міністра сувязі й інфарматызацыі Ларысы Лабковіч. Намесьніца міністра адзначыла, што гадавое заданьне па аказаньні платных паслуг насельніцтву сотавы апэратар «БеСТ» выканаў на 13 %, а «БелСел» — на 58 %.