Парашэнка: Пытанне па НАТА будзе пастаўленае толькі тады, калі па ім будзе кансэнсус усіх рэгіёнаў краіны
Большасць грамадзян Украіны выступае за ўступленне ў НАТА. Аб гэтым заявіў прэзідэнт Украіны Пятро Парашэнка, выступаючы са зваротам да Вярхоўнай Рады Украіны.
«У выпадку правядзення агульнанацыянальнага рэферэндуму, мы б лёгка выйгралі», — сказаў Парашэнка.
Але, па словах прэзідэнта, на Захадзе не спяшаюцца адкрываць дзверы Альянсу для Украіны.
«Мы будзем вельмі жорстка адстойваць нашы інтарэсы … Наша задача — дасягненне ўсіх неабходных для ўступлення крытэраў. І права прымаць гэтае рашэнне належыць выключна ўкраінскаму народу на ўсеўкраінскім рэферэндуме», — заявіў Парашэнка.
Разам з тым, ён падкрэсліў, што не дазволіць выкарыстоўваць гэтую тэму для расхіствання сітуацыі ўнутры краіны. І пытанне па НАТА будзе пастаўленае толькі тады, калі па ім будзе кансэнсус усіх рэгіёнаў краіны.