Сяргей Румас бярэ ўдзел у нефармальнай сустрэчы кіраўнікоў еўрапейскіх нацыянальных федэрацый і УЕФА
Старшыня Беларускай федэрацыі футбола Сяргей Румас і яго першы намеснік Сяргей Сафар'ян бяруць удзел у нефармальнай сустрэчы кіраўнікоў нацыянальных федэрацый Еўропы і УЕФА. Мерапрыемства праходзіць 5—6 чэрвеня ў Берліне ў межах фінальнага матчу Лігі чэмпіёнаў паміж іспанскай «Барселонай» і італьянскім «Ювентусам».
Румас паведаміў БелаПАН, што сустрэча павінна была насіць афіцыйны характар.
На ёй планавалася абмеркаваць пазіцыю УЕФА ў дачыненні да карупцыйнага скандалу ў ФІФА, аднак у выніку пакуль усё абмяжуецца нефармальнымі кансультацыямі.
У самой БФФ сітуацыю ў Міжнароднай федэрацыі футбола не каментуюць, указваючы на тое, што ідзе следства.
29 мая прэзідэнт ФІФА Ёзеф Блатэр быў абраны на пяты тэрмін, аднак праз некалькі дзён функцыянер падаў у адстаўку. Пакуль ён працягвае выконваць свае абавязкі.