ЛНР і ДНР прапануюць Кіеву лічыць іх часткай Украіны, але з правам мець уласныя арміі
Дэйнега і Пушылін, Мінск, люты 2015, ria.ru
Самаабвешчаныя тэрытарыяльныя утварэнні ДНР і ЛНР прапанавалі Кіеву абвясціць іх «асобнымі раёнамі з асаблівым статусам», пры гэтым лічачы «неад'емнай складовай часткай Украіны».
Пра гэта гаворыцца ў сумеснай заяве лідараў ДНР і ЛНР Дзяніса Пушыліна і Уладзіслава Дайнэгі.
Пры гэтым яны прапануюць Кіеву таксама прызнаць за імі паўнамоцтвы кіраўнікоў асобных раёнаў, а рашэнне аб працягу або спыненні гэтых паўнамоцтваў пакінуць за самімі рэгіёнамі.
Прапануецца надзяліць органы мясцовага самакіравання асаблівым статусам і ствараць органы аховы грамадскага парадку.
«Органы мясцовага самакіравання асобных раёнаў з асаблівым статусам і органы кіравання іх асацыяцый у мэтах забеспячэння грамадскай бяспекі маюць права ствараць органы аховы грамадскага парадку: народную міліцыю», — гаворыцца ў дакуменце.
На сёння ў так званых «народных міліцыях» ДНР і ЛНР на ўзбраенні больш за 550 танкаў. Гэта сувымерна з найбольшымі еўрапейскімі арміямі.