Аж 6 украінскіх вайскоўцаў загінула за апошнія суткі ад рук расійскіх баевікоў
За мінулыя суткі на Данбасе загінулі шасцёра ўкраінскіх вайскоўцаў, яшчэ чатырнаццаць атрымалі раненні. Пра гэта ў суботу, 13 чэрвеня, на брыфінгу заявіў спікер Антытэрарыстычнай аперацыі Андрэй Лысенка, перадаюць украінскія СМІ.
Украінскія сілы панеслі страты на Данецкім і Луганскім кірунках. На Марыупальскім кірунку страт не было.
Гэта найбольшыя страты ўкраінскай арміі ад моманту атакі баевікоў на Мар'інку ў пачатку чэрвеня. І адны з найбольшых ад часу заключэння перамір'я ў Мінску, што ўступіла ў дзеянне з 15 лютага.
У выніку моцнага мінамётнага абстрэлу ўчора баевікі таксама перабілі газаправод Краматорск— Марыупаль, пакінуўшы без газу ўкраінскія гарады на ўзбярэжжы Азоўскага мора.