«Белтрансгаз»: транзыт скараціўся нязначна
Транзыт газу праз тэрыторыю Беларусі скараціўся нязначна, паведаміў гендырэктар «Белтрансгазу» Ўладзімер Маёраў, камэнтуючы сытуацыю з абмежаваньнем Расеяй паставак газу ва Ўкраіну. Канкрэтныя лічбы стратаў кіраўнік «Белтрансгазу» не агучыў.
Транзыт газу праз тэрыторыю Беларусі скараціўся нязначна, паведаміў гендырэктар «Белтрансгазу» Ўладзімер Маёраў, камэнтуючы сытуацыю з абмежаваньнем Расеяй паставак газу ва Ўкраіну. Пры гэтым ён не агучыў канкрэтных лічбаў, аднак дадаў, што гаворка вядзецца пра пэўную страчаную выгаду. Паводле словаў гендырэктара, тлумачэньняў з расейскага боку «Белтрансгаз» пакуль не атрымаў.
Спадар Маёраў падкрэсьліў, што Беларусь атрымлівае расейскі газ у адпаведнасьці з кантрактамі, за што краіна разьлічваецца цалкам і своечасова. Няма праблемаў і з транзытам прыроднага газу для заходніх спажыўцоў.
Учора агенцтва «Інтэрфакс» распаўсюдзіла інфармацыю, што кожны дзень чарговага газавага канфлікту Расеі з Украінай наносіць беларускаму бюджэту шкоду на 140 тысяч даляраў. З такой ацэнкай пагадзілася аглядальніца газэты «Белорусы и рынок» Тацяна Манёнак.
«Сапраўды, Беларусь не атрымлівае гэтых грошай за прапампоўваньне газу ва Ўкраіну праз нашу тэрыторыю. Гэта за тую частку, якая пастаўлялася праз нашу газавымяральную станцыю «Мазыр». Страты прыблізна такія», — заявіла ў інтэрвію Радыё Свабода Тацяна Манёнак.
«Белтрансгаз» 4 сакавіка не камэнтаваў свае страты.
Нагадаем, што 3 сакавіка «Газпром» скараціў пастаўкі газу ва Ўкраіну на 25% (паводле ўкраінскага боку — на 35%), а 4 сакавіка яшчэ на 25%.