У Бабруйску загарэўся электравоз
Пажар у лакаматыве таварнага цягніка, які рухаўся па маршруце Жлобін — Асіповічы, узнік раніцай 20 кастрычніка ў Бабруйску. Пацярпелых няма.
Як паведамілі ў Магілёўскім абласным упраўленні МНС, інфармацыя пра ўзгаранне паступіла прыкладна ў 4.50. У таварным саставе з 72 вагонаў загарэўся электравоз, прыпісаны да Асіповіцкага лакаматыўнага дэпо.
У выніку ўзгарання былі пашкоджаны электракабелі і электраабсталяванне ў машынным аддзяленні электравоза. Меркаваная прычына пажару — кароткае замыканне электраправодкі.
Затрымкі руху іншых цягнікоў не адбылося.