З Расіі ў Беларусь экстрадавалі былога высокапастаўленага міліцэйскага чыноўніка
Кампетэнтным органам Беларусі перададзены беларускі грамадзянін Георгій Жук. Як паведамляе пракуратура Маскоўскай вобласці, ён адшукваўся за ўчыненне злачынства, прадугледжанага ч. 3 арт. 430 КК (атрыманне хабару).
Паводле інфармацыі праваахоўных органаў, Жук, займаючы пасаду выканаўца абавязкаў начальніка ўпраўлення папярэдняга расследавання ГУУС Мінскага гарвыканкама, у 2005 годзе атрымаў ад заснавальніка прыватнага гандлёвага прадпрыемства хабар у 80 тысяч даляраў ЗША. За ўказаную суму Жук абяцаў спыніць праверкі арганізацыі, а таксама крымінальную справу, распачатую ў дачыненні да партнёра заснавальніка.
Пасля ўчынення злачынства Жук схаваўся ад праваахоўных органаў.
У сакавіку 2015 года супрацоўнікі паліцыі затрымалі яго на тэрыторыі Арэхава-Зуеўскага раёна Маскоўскай вобласці.
У дачыненні да Жука органы пракуратуры Маскоўскай вобласці правялі экстрадыцыйную праверку. Матэрыялы былі накіраваны ў Генеральную пракуратуру РФ, па рашэнні якой цяпер ён выдадзены беларускаму боку для прыцягнення да крымінальнай адказнасці.