Дзяржаўнае кітайскае СМІ памылкова паведаміла аб адстаўцы Сі Цзіньпіна
У Кітаі ад працы адхілілі чатырох рэдактараў навінавага агенцтва China News Service.
Гэта адбылося пасля таго, як у матэрыяле пра візіт прэзідэнта краіны Сі Цзіньпіна ў ПАР пераблыталі словы «адстаўка» і «прамова».
Памылка адбылася з-за падабенства гэтых слоў у кітайскай мове.
Паколькі навіна была апублікаваная дзяржаўным агенцтвам, паведамленне перадрукавалі іншыя кітайскія СМІ.
Дэпартамент прапаганды кампартыі Кітая абавязвае СМІ заўсёды публікаваць галоўныя навіны, і асабліва навіны аб дзяржаўных лідарах, са спасылкай на дзяржаўныя агенцтвы. У Кітаі агенцтва China News Service мае такі ж афіцыйны статус, як дзяржаўнае агенцтва «Сіньхуа».