Міліцыя шукае кіроўцу, які мог падвозіць зніклую ў Брэсце школьную настаўніцу
Міліцыя шукае кіроўцу, які мог падвозіць зніклую два тыдні таму ў Брэсце 38-гадовую Валянціну Голуб.
Як паведамілі ў аддзяленні інфармацыі і грамадскіх сувязяў УУС Брэсцкага аблвыканкама, падчас вышуковых мерапрыемстваў устаноўлена, што жанчына 22 снежня прыкладна ў 15.00 у Брэсце, у раёне скрыжавання вуліц Гогаля і Леніна, спрабавала спыніць аўтамабіль.
Валянціна Голуб, настаўнік сярэдняй школы № 9 Брэста, 22 снежня прыблізна ў 14.00 пайшла са школы пасля працы і дома не з'явілася. Яе мабільны тэлефон застаўся на працы. На сувязь з роднымі і блізкімі жанчына не выходзіла. 23 снежня ў 21.00 у міліцыю звярнуўся муж зніклай.
Другога студзеня Брэсцкі міжраённы аддзел Следчага камітэта распачаў крымінальную справу па факце знікнення Валянціны Голуб.
Да гэтага часу месцазнаходжанне жанчыны невядомае. Пошукавыя мерапрыемствы праводзяцца ў Брэсце і за яго межамі, адпрацоўваюцца розныя версіі.
Прыкметы зніклай: на выгляд 35-40 гадоў, рост 170 см, сярэдняга целаскладу, валасы доўгія русыя. Была апранутая ў паўпаліто балонневае чорнага колеру, пінжак цёмнага колеру, блузку белага колеру ў чорны гарошак, чорную спадніцу і боты малочнага колеру.
Фота: УУС Брэсцкага аблвыканкама
Супрацоўнікі крымінальнага вышуку Маскоўскага РАУС Брэста просяць кіроўцу, які мог падвезці жанчыну, паведаміць аб гэтым па тэлефонах: 8(029)727-27-93 («МТС»), 8(0162)47-90-50, 8(0162)47-91-32 або 102.