Турцыя заявіла пра новае парушэнне турэцкай паветранай прасторы расійскім самалётам
Reuters.com
Прэзідэнт Турцыі Рэджэп Таіп Эрдаган заявіў, што хоча сустрэцца з прэзідэнтам Расіі Уладзімірам Пуціным пасля інцыдэнту з расійскім вайсковым самалётам.
Пра гэта ў суботу паведамляе агенцтва Reuters.
Раней у суботу МЗС Турцыі заявіла, што вайсковы самалёт РФ парушыў у пятніцу турэцкую паветраную прастору.
Інцыдэнт адбыўся напярэдадні, а ў суботу, 30 студзеня, расійскага пасла выклікалі ў міністэрства замежных спраў Турцыі для тлумачэнняў.
Па дадзеных Анкары, расійскі самалёт Су-34 некалькі разоў папярэдзілі на англійскай і рускай мовах, перш чым той заляцеў ў турэцкую паветраную прастору. Акрамя таго, знешнепалітычнае ведамства Турцыі перасцерагае Маскву, што менавіта Расія будзе несці адказнасць за любыя «небяспечныя» наступствы.
Нагадаем, у лістападзе Турцыя збіла расійскі бамбардзіроўшчык Су-24, задзейнічаны ў ваеннай аперацыі ў Сірыі. У адказ РФ увяла санкцыі на турэцкія прадукты харчавання і тавары.