Падзенне з паскарэннем: эканоміка Беларусі ў студзені знізілася на 4,3%
У студзені 2016 года валавы ўнутраны прадукт Беларусі ўпаў на 4,3% да студзеня 2015 года, склаўшы 73,2 трлн, паведамляе Нацыянальны статкамітэт. Па выніках 2015 года беларуская эканоміка ўпала на 3,9% да 2014 года, у студзені мінулага года падзенне складала 0,8%.
Аб'ём выпуску прамысловай прадукцыі знізіўся на 6,8%, склаўшы 58,7 трлн. Запасы гатовай прадукцыі на канец студзеня выраслі да 35,7 трлн рублёў, або 74,3% ад сярэднямесячнага аб'ёму вытворчасці супраць 68,7% на канец года.
Выпуск сельскагаспадарчай прадукцыі гаспадаркамі ўсіх катэгорый уласнасці вырас на 0,9% да 6,4 трлн.
Інвестыцыі ў асноўны капітал склалі 10,7 трлн, што на 19,3% менш, чым за студзень 2015 года. Са згаданай сумы 6,1 трлн прыпадае на будаўніча-мантажныя работы (мінус 18,8% да студзеня мінулага года). Затраты на набыццё машын і абсталявання склалі 2,8 трлн рублёў (мінус 32,6%).
У студзені ўведзена ў строй 473,6 тыс. кв. м жылля, што на 25,6% менш, чым у аналагічным перыядзе мінулага года.
Рознічны таваразварот дасягнуў 27,2 трлн рублёў (мінус 1,8%), аптовы — 47,9 трлн (мінус 4,8%).
На гэты год ўлады плануюць мінімальны рост эканомікі (на ўзроўні 0,3%). Міжнародныя фінансавыя інстытуты прагназуюць зніжэнне ВУП Беларусі на 0,5-1%. Але ўсе гэтыя разлікі не ўлічвалі турбулентнасць, у якую трапіла Беларусь і яе асноўны гандлёвы партнёр Расія ў пачатку 2016 года