Наркевіч: Дзяржава зніжае градус у адносінах з ІП
Дзяржава робіць крок насустрач індывідуальным прадпрымальнікам. Улады не будуць адмяняць 222-ы ўказ і працэдуру сертыфікацыі, але гатовыя пайсці на спрашчэнне бізнес-працэсаў для індывідуальных прадпрымальнікаў. Пра гэта распавяла ў інтэрв'ю праграме «Неделя» тэлеканала СТБ 21 лютага намеснік міністра гандлю Беларусі, сустаршыня рабочай групы па праблемных пытаннях індывідуальных прадпрымальнікаў Ірына Наркевіч.
Яна распавяла, што прадпрымальнік у гандлёвым цэнтры ці на рынку можа мець да трох «кропак». Адпаведныя органы дазволяць мець суправаджальныя дакументы на тавар толькі ў адной з іх.
«Як правіла, у яго недзе сканцэнтраваныя дакументы. Цяпер па заканадаўстве суправаджальныя дакументы павінны быць ва ўсіх трох месцах. Навошта? Мы зніжаем градус. Мы не кажам, што не павінна быць дакументаў. Мы кажам, што мы спрашчаем. І кажам, што гэтыя дакументы павінны быць у адным месцы «, - заявіла яна.
Наркевіч лічыць, што цяпер ідзе працэс «крышталізацыі» пакета суправаджальных дакументаў для індывідуальных прадпрымальнікаў.
У інтэрв'ю праграме «Контуры» на АНТ Наркевіч заявіла, што трэба ўсім разам пражываць сітуацыю, якая склалася. Яна паведаміла, што па краіне назіраецца павелічэнне прадпрымальнікаў, што выйшлі на працу ў параўнанні са студзенем. Усяго ў Беларусі працуе 540 гандлёвых цэнтраў.
У краіне дзейнічаюць 240 тысяч індывідуальных прадпрымальнікаў, якія займаюцца не толькі гандлем, але і вытворчасцю, а таксама аказаннем бытавых паслуг. Пра гэта распавяла яшчэ адзін сустаршыня рабочай групы па праблемных пытаннях ІП і намеснік міністра эканомікі Ірына Касцевіч. Намеснік міністра лічыць, што пік напружання ва ўзаемаадносінах ІП і дзяржавы пройдзены.
Паводле яе слоў, улады гатовыя працаваць з ІП столькі, колькі спатрэбіцца.
24 лютага адбудзецца чарговае пасяджэнне рабочай групы па пытаннях прадпрымальнікаў.
Нагадаем, з 1 студзеня ўступіў у сілу славуты указ № 222, па якім прыватныя прадпрымальнікі павінны прадаваць тавары легпрама толькі з суправаджальнымі дакументамі. Многія прадстаўнікі малога бізнесу з-за гэтага спынілі працу. Па іх словах, у іх няма магчымасці працаваць па новых правілах.