Пуцін загадаў пачаць «вывад асноўных войскаў з Сірыі»
Аналітыкі гадаюць аб прычынах такога рашэння.
фота прэс-службы прэзідэнта РФ
Прэзідэнт Уладзімір Пуцін загадаў пачаць вывад асноўных сіл Расіі з Сірыі з 15 сакавіка. Аб гэтым кіраўнік дзяржавы заявіў на сустрэчы з міністрам замежных спраў Сяргеем Лаўровым і міністрам абароны Сяргеем Шайгу.
«Лічу, што задачы, пастаўленыя перад Міністэрствам абароны, у цэлым выкананы. Таму загадваю з заўтрашняга дня пачаць вывад асноўнай часткі нашай вайсковай групоўкі з Сірыйскай Арабскай Рэспублікі», — заявіў Пуцін.
Па словах прэзідэнта РФ, пункты базавання расійскіх узброеных сіл у порце Тартус і на авіябазе Хмеймім «будуць функцыянаваць у ранейшым рэжыме, яны павінны быць надзейна абаронены з сушы, мора і з паветра».
Расійскія СМІ паведамляюць, што Пуцін паінфармаваў прэзідэнта Сірыі Башара Асада аб сваім рашэнні. Новы крок Масквы — гэта, мусіць, вялікі ўдар для Дамаска.
Пакуль няясна, што стаіць за гэтым рашэннем. Аналітыкі звяртаюць увагу на тое, што расійскім войскам не ўдалося рашуча змяніць ход грамадзянскай вайны. У Масквы проста няма рэсурсаў для вядзення працяглага канфлікту.