Уладзімір Беражкоў выпушчаны з СІЗА пад падпіску аб нявыездзе
Расійскі журналіст Аляксей Шаўчэнка заявіў, што экс-генеральны менеджар мінскага «Дынама» Уладзімір Беражкоў вызвалены з СІЗА.
«Па маіх дадзеных, Беражкова адпусцілі. Так што і ніякага суда не будзе. Схуднеў, хварэў, але на волі, жывы і наогул: ура!» — напісаў Шаўчэнка ў сваім твітары.
Гэтую інфармацыю пацвердзіла Tribuna.com крыніца, знаёмая з сітуацыяй.
Прэс-сакратар Генпракуратуры Пётр Кісялёў пракаментаваў для pressball.by навіну пра вызваленне Беражкова.
«У дачыненні да Уладзіміра Беражкова змененая мера стрымання. З заключэння пад варту на падпіску аб нявыездзе. Крымінальная справа па-ранейшаму знаходзіцца ў Генпракуратуры. У дачыненні да іншага фігуранта справы (Максіма Суботкіна) усё засталося па-ранейшаму».
***
Глядзі таксама: Пяць фактаў пра Уладзіміра Беражкова.
***
У канцы ліпеня 2015 г. быў затрыманы былы гендырэктар ХК «Дынама-Мінск» Максім Суботкін. Яму выставілі абвінавачанне на падставе ч. 3 арт. 424 КК (злоўжыванне службовымі паўнамоцтвамі, што пацягнула цяжкія наступствы ў выглядзе нанясення ўрону ў асабліва буйным памеры).
14 жніўня 2015 г. Следчы камітэт паведаміў пра затрыманне Уладзіміра Беражкова. 27 жніўня прадстаўнікі СК і МУС паведамілі журналістам, што Беражкову выстаўленае абвінавачанне ў завалоданні грашовымі сродкамі клуба на 1 млрд. 90 млн. рублёў з выкарыстаннем службовых паўнамоцтваў (ч. 4 арт. 210 КК).
1 лютага 2016 г. ім былі прад'яўленыя канчатковыя абвінавачванні. Дзеянні былога генеральнага дырэктара хакейнага клуба М. Суботкіна ў выніковай рэдакцыі абвінавачванні кваліфікаваныя паводле ч.3 арт. 424, ч.3 арт.426, ч.4 арт.210 Крымінальнага кодэкса Рэспублікі Беларусь, а былога генеральнага менеджара клуба У.Беражкова паводле ч.3 арт.424, ч.4 арт.210. Матэрыяльная шкода на суму больш за 3 мільярды рублёў пакрыта практычна цалкам.
Па завяршэнні азнаямлення з матэрыяламі крымінальнай справы абвінавачванымі былі заяўленыя хадайніцтвы аб вызваленні іх ад крымінальнай адказнасці ў парадку, устаноўленым арт. 88-1 Крымінальнага кодэкса Рэспублікі Беларусь.